खोज

धनगढी, ७ पुस । एनआरएनए छैठौं फारवेष्ट पशुपति कप फुटबल प्रतियोगितामा ईलाईट युवा क्लब र घोडाघोडी युवा क्लबले जित निकाल्दै अन्तिम आठमा स्थान बनाएका छन । फारवेष्ट पशुपति युवा क्लबको आयोजनामा जारी प्रतियोगिताको दोस्रो दिन भएका खेलमा ईलाईटले अलस्टार्स स्पोर्टस एकेडेमीलाई १–० तथा घोडाघोडीले टेकवहादुर चोखाल फाउण्डेसनलाई टाईब्रेकरमा ४–२ ले पराजित गर्दै क्वाटरफाईनल प्रवेश गरेका हुन ।
धनगढी रंगशालामा भएको पहिलो खेलमा ईलाईट युवा क्लबले अलस्टार्स स्पोर्टस एकेडेमीलाई १–० ले पराजित गर्दै अन्तिम आठमा स्थान बनाएको हो । ईलाईटको जितमा विदेशी खेलाडी फोफानाले पेनाल्टी शुटआउटमा एकमात्र गोल गरे । दोस्रो हाफको २६ औं मिनेटमा अलस्टार्सका सौगात मगरले ह्यान्ड गरेपछि प्राप्त गरेको पेनाल्टीलाई विदेशी खेलाडी फोफानाले गोलमा परिणत गरे । उनी खेलको म्यान अफ द म्याच घोषित हुदै नगद ५ हजार रुपैयासहित ट्रफीबाट पुरस्कृत भए ।

शनिबार नै भएको दोस्रो खेलमा घोडाघोडी युवा क्लबले टेकवहादुर चोखाल फाउण्डेसनलाई टाईब्रेकरमा ४–२ ले हराएर क्वाटरफाईनल प्रवेश गरेको हो । निर्धारित समय दुबै टोलीले दुई गोलको बराबरी खेलेका थिए । पहिलो हाफको १२ मिनेटमा गोल गर्दै घोडाघोडीले अग्रता लियो । पहिलो हाफकै १९ मिनेटमा टेकवहादुर चोखाल फाउण्डेसनका लागि ज्ञानु भण्डारीले गोल गर्दै खेल बराबरीमा पुराए । दोस्रो हाफको दोस्रो मिनेटमै टेकवहादुर चोखाल फाउण्डेसनकासुदीप धामीले गोल गर्दै आफ्नो टीमलाई २–१ म पुराए । दोस्रो हाफको १९ औ मिनेटमा फाउण्डेसनले आत्मघाती गोल खादै बराबरीमा आयो । पेनाल्टी सुटआउटमा फाउण्डेसनका ज्ञानु भण्डारी र राजेन्द्र प्रताप सिंहको पेनाल्टी प्रहारलाई घोडाघोडीका गोलरक्षक राजेन्द्र विष्टले बचाए । घोडाघोडीका लागि सुजित बुढाथोकी संजीव लामा माईकल शाही र करन रावतले पेनाल्टीलाई गोलमा परिणत गरे । फाउण्डेसनका लागि सुदिप विक र मदननाथ योगीले मात्रै गोल गरे । टिमलाई जित दिलाउन सफल घोडाघोडीका गोलरक्षक विक्रम विष्ट म्यान अफ द म्याच भए । उनले नगद उनले नगद ५ हजार सहित ट्रफी पाएका छन् ।

प्रतियोगिता अन्तर्गत पहिलो खेलमा ब्वाईज युनियन लम्की र नेपाल प्रहरी सुदुरपश्चिम प्रदेश तथा दोस्रो खेलमा पुर्नवास युनाईटेड र ग्रीन युथ क्लब प्रतिस्पर्धा गर्नेछन । धनगढी रंगशालामा पुस १४ गतेसम्म चल्ने प्रतियोगितामा १५ टीमको सहभागी रहेको छ । प्रतियोगिताको विजेताले पाँच लाख र उपविजेताले २ लाख पाउने छन् । प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५–१५ हजार रुपैयाँ पुरस्कार पाउने आयोजक फारवेष्ट पशुपति युवा क्लबका अध्यक्ष खेम रावतले बताए ।