खोज

दाङ, ६ पुस ।

दाङको तुलसीपुर क्षेत्रमा रगतको अभाव भएपछि उपमहानगरपालिकाले रक्तदान कार्यक्रम आयोजना गरेको छ । नियमित रक्तदात गर्नेहरू पनि रक्तदानका लागि इच्छुक नभएपछि रगतको अभाव देखिएको छ ।

रक्त सञ्चार केन्द्र तुलसीपुरका प्राविधिक प्रमुख नरेश चौधरीका अनुसार रगत व्यवस्थापन गर्न निकै गाह्रो भइरहेको बताए । रगत अभावका कारण नियमितरूपमा डाइलासिश गर्ने बिरामीहरुलाई समेत फर्काउनु परेको उनले बताए । प्राविधिक प्रमुख चौधरीले अहिले सबैभन्दा बढी बि पोजेटिभ रगतको बढी अभाव देखिएको बताए । उनका अनुसार मंसिर महिनामा भएको रक्तदान कार्यक्रमबाट ४२ पिन्ट रगत संकलन भएको र एक सय ४४ पिन्ट खपत भएको बताए ।

नेपाल रेडक्रस सोसाइटी दाङको तथ्यांकअनुसार तुलसीपुरमा मात्रै दैनिक १० पिन्टसम्म रगत खपत हुने गरेको छ । खपतको तुलनामा रक्तदान हुन सकेको छैन । तुलसीपुर उपमहानगरपालिका जनस्वास्थ्य प्रवद्र्धन शाखाका जनस्वास्थ्य निरीक्षक विमल केसीले रक्तदान गर्दा कमजोर हुने मानसिकताका रक्तदाताको संख्या न्यून रहेको बताए । केसीका अनुसार पुरुषको शरीरलाई प्रतिकेजी ७६ एमएल र महिलाको शरिरमा प्रतिकेजी ६६ एमएल रगत हुन्छ तर शरीरका लागि रगत ५० एमएल भए पर्याप्त हुने बताए ।

तुलसीपुर उपमहानगरपालिकाका नगरप्रमुख टीकाराम खड्काले रक्तदान गर्दै दिनहुँ रगतका लागि फोन आइरहेको र अभाव भएको जानकारी भएपछि पालिकास्तरबाटै रक्तदान कार्यक्रम आयोजना गरिएको बताए । नगरप्रमुख खड्काले ५७ वर्षको उमेरसम्म पनि आफूले नियमितरुपमा रक्तदान गर्दै आएको बताए ।