खोज

बुटवल, १० मंसिर । बुटवलमा अटो संचालन गर्दै आएको टेम्पो ब्यवसायीहरुप्रति स्थानीय सरकारबाट ज्यादती भएको राजनीतिक दलहरुले बताएका छन् । विभिन्न दलका प्रतिनिधिहरुलाई राखेर टेम्पो व्यवसायीहरुले आइतबार आयोजना गरेको अन्तक्र्रियामा उपस्थित दलका प्रतिनिधिले ज्यादती हटाउन बुटवल उपमहानगरसँग माग गरेका हुन् ।

टेम्पो व्यवसायीहरुले नगरमा दर्ता खारेज गरी यातायात व्यवस्था कार्यालयबाट सञ्चालन गरिनुपर्ने, एकोहोरो कर प्रणाली हुनुपर्ने, सवारी साधनको दुईवटा नम्बर प्लेटदुईवटा ब्लुबुक र दुईवटा रुट परमिट खारेज हुनुपर्ने, ५ हजार, ८ हजार र १० हजार रुपियाँ जरिवाना खारेज हुनुपर्ने, बाटोमा निर्वाध चल्न पाउनुपर्ने, नगरबासीमात्र हुनुपर्ने भन्ने निर्णय खारेज हुनुपर्ने, प्रहरीको ज्यादती बन्द गरिनुपर्ने लगायतका माग गरेका छन् ।

स्वरोजगारमुलक ब्यवसाय गर्दै आएको टेम्पो ब्यवसायलाई धरासायी हुने गरी बिना अध्ययन पालिकाहरुले दोहोरो रुपमा कर उठाउने, पालिकास्तरमा आवतजावत रोक्ने जस्ता गलत काम गरेको भन्दै यसलाई तुरुन्त हटाउन विभिन्न राजनीतिक दलका नेताहरुले आग्रह गरेका छन् ।

तिनाउ टेम्पो यातायात प्रालिद्वारा “सरोकारवालाको ज्यादती अवरोध, कानुनी स्पष्टता हुँदाहँुदै ब्यावहारिक कठिनाई किन ?” भन्ने विषयमा भएको अन्तक्र्रियामा बोल्दै दलका प्रतिनिधिले दोहोरो कर हटाउन र र नगरमा हुने दर्ता खारेजको व्यवसायीको मागमा सहमति जनाएका हुन् ।

कार्यक्रममा नेकपा माओवादी बुटवल उपमहानगर कमिटिका अध्यक्ष महेन्द्र भुसालले यातायात ब्यवस्था कार्यालयमा दर्तापछि नगरमा रुट तयार गरेर चलाउनुपर्ने बिषयका बारेमा विगत लामो समयदेखि केवल छलफलको विषय बनेको बताए । स्थानीय सरकार काम गर्नेभन्दा पनि प्रचारमा लागेको दुखेसो गर्दै उनले एउटै सवारीको दोहोरो कर उठाउने जस्ता गलत नीतिका विरुद्ध आफुहरु विरोधमा उत्रन तयार रहने बताए । जनताको समस्या र आवश्यकता पूरा गर्नेभन्दा हरेक विषयमा राजनीति बढी भएको उनले दाबी गरे ।
“जुँगाको लडाईमा नेताहरु लड्दा आम नागरिकले दुख पाएका छन् ।’—उनले भने । केन्द्रमा नेपाली काँग्रेस पार्टीसंग आफुहरुको सहकार्य भएको भन्दैमा स्थानीय सरकारबाट भएका गलत कदमका विरुद्ध चुप नलाग्ने उनले बताए ।

नगरमा दर्ता खारेज, नेपाली नागरिकताको आधारमा सवारी चलाउन पाउनुपर्ने आफुहरुको माग रहेको प्रालिका अध्यक्ष महेन्द्र प्रसाद श्रेष्ठले बताए । ‘एक घर एक अटो’ नीति ल्याएर त्यस क्षेत्रमा कार्यान्वयन नभएको उनले दुखेसो गरे । अटो ब्यवसायीहरुले अदालतमा मुद्दा हालेपनि पेसी अगाडि नबढेको भन्दै आवश्यक परे सर्वोच्च अदालतमा जाने पनि उनले बताए ।

नेपाली काँग्रेस बुटवल उपमहानगरका उपसभापति ज्योति भण्डारीले नगरलाई ब्यवस्थित पार्किङ, वैज्ञानिक आधारमा संख्या लगायतका काम अघि बढाएको बताउँदै स्थानीय सरकारले यसवर्ष १६ वटा टेम्पो दर्ता गरेको भन्दै तर यो पनि प्रयाप्त नभएको बताए ।

नेकपा एमाले बुटवल उपमहानगर सचिव मेघराज भट्टराईले आधारभूत आवश्यकतालाई मौलिक हकका रुपमा मानिने भन्दै बुटवलको सडकको अवस्था अनुसार सवारी चाप नियन्त्रण गर्ने गरी नीति ल्याउनेतर्फ ध्यान दिनुपर्ने सुझाव दिए ।

कार्यक्रममा जनता समाजवादी पार्टीका मनिकर कार्कीले धेरै पहिलेदेखि शुरु भएको रिक्साको संख्या यकिनको कामलाई टुङयाउनेमा सरकारको ध्यान नगएको दुखेसो गरे । नेपालको संविधानमा वैधानिक दर्ता गरेको नेपाली नागरिक जुनसुकै क्षेत्र, ठाउँमा पुगेर ब्यवसाय गर्न पाउने कानुनी प्रावधान रहेको उनले बताए । ‘यो आधारभुत मौलिक हकलाई रोक्न पाइदैन ।’—उनले भने ।

नेकपा समाजवादी पार्टीका चिन बहादुर गुरुङ, नेकपाका विरेन्द्र बिक, राष्ट्रिय यातायात उद्यमशिलता भलाईकोषका वसन्त श्रेष्ठले दोहोरो कानुन अन्त्य हुनुपर्ने, टम्पो र अटोको विषय फरक भएको तथा यसको नियमबारे सरकार गम्भीर हुनुपर्ने सुझाव दिए ।

तिनाउ यातायात प्रालिका सल्लाहकार जिवलाल भुषालले यातायात कार्यालयमा दर्ता भएपछि फेरि दोहोरो दर्ता हुने झण्टिलो प्रक्रिया हटाउनुपर्ने बताए । दलका नेताहरुलाई एउटै फोरममा ल्याएर समस्या बुझाउने गरी कार्यक्रम गरिएको उनले बताए । हाल प्रालिमा ३० वटा टेम्पोहरु आवद्ध रहेका छन् ।