खोज

बुटवल, २५ कात्तिक ।

अस्पताल विकास समिति गठन आदेश खारेज गरेको लुम्बिनी प्रदेश सरकारले महिना दिन नबित्दै आफ्नै निर्णय उल्ट्याएको छ । प्रदेश सरकारले लुम्बिनी प्रादेशिक अस्पतालको ब्यवस्थापन समितिको अध्यक्षमा बुटवलका जीवन बझालाई नियुक्त गरेसँगै विकास समिति गठन आदेश खारेजको आफ्नै निर्णय उल्ट्याएको हो । मुख्यमन्त्री लिला गिरीको सरकार ढलेसंगै उनको पालामा भएका अधिकाश नियुक्ती परिवर्तन शुरु भएको थियो ।

अस्पताल विकास समिति गठन तथा संचालन नियमावली, २०८० को नियम ३ को उपनियम १ को खण्ड (क) बमोजिम स्वास्थ्य मन्त्रालयको कात्तिक २३ गते कार्यवाहक मुख्यमन्त्री तथा अर्थमन्त्री स्तरको बैठकले अस्पताल विकास समितिको अध्यक्षमा मनोनयन गर्ने निर्णय गरेको हो । कार्यबाहक मुख्यमन्त्रीको अध्यक्षतामा बसेको बैठकले लुम्विनी प्रदेशका १३ वटा अस्पताल मध्ये माओवादी केन्द्रले ४ र बांकी अस्पताल कांग्रेस लगायत अन्य साना दललाई अध्यक्ष दिइएको छ । मुख्यमन्त्री डिल्ली बहादुर चौधरी र स्वास्थ्यमन्त्री राजु खनाल नीजि कामको शिलशिलामा बिदेश छन् ।

बजारमा नयाँ अध्यक्षका रुपमा महेश थैव र गोविन्द खनालको चर्चा चलिरहँदा रातारात जीवन बझालाई सजाएर ल्याईएको हो । लुम्बिनी प्रादेशिक अस्पतालको अध्यक्षमा नियुक्त जीवनप्रसाद वझा बुटवलमा रहेको सिद्धार्थ बाल तथा महिला अस्पताल (आम्दा) का संस्थापक अध्यक्ष तथा वर्तमान स्थायी बोर्ड सदस्य छन् ।

अस्पतालको पुर्वाधार निर्माण, स्तरवृद्धिमा मेशिन खरिद देखि कर्मचारी नियुक्तीसम्ममा आर्थिक पारदर्शीतामा बेथिती भैरहेको बेला वझाको नियुक्तिलाई शंकाको दृष्टिबाट हेरिएको छ । प्रदेश सरकारले अस्पतालको स्तरवृद्धि गर्ने भन्दै २५ करोड रुपैयाँ बजेट बिनियोजन गरेर एमआरआई मेशिन खरिद गर्न निर्देशन दिएको लामो समय हुँदा पनि कमिशनकै कारण काम अघि नबढेको अस्पतालका चिकित्सकहरुको दुखेसो छ ।

श्रोतका अनुसार खनाललाई प्रदेशस्तरको सहकारी बोर्डको सदस्यमा नियुक्ति दिने अस्पताल ब्यवस्थापनको अध्यक्षको दौडबाट हटाईएको हो । बुटवल उद्योग बाणिज्य संघका पुर्व अध्यक्ष समेत रहेका वझालाई बुटवल उद्योग बाणिज्य संघको अघिल्लो महिना सम्पन्न निर्वाचनमा दिनेश श्रेष्ठलाई हराउन गरेको सौदाबाजी अनुसार नियुक्त गरिएको कांग्रेस कार्यकर्ताहरु बताउँछन् । पार्टीभित्र एउटा पक्षलाई काखी च्याप्ने गरी आर्थिक चलखेलको प्रवृत्ति मौलाएको कार्यकर्ताहरु बताउँछन् ।

दाङको राप्ती प्रादेशिक, नवलपरासीको परासी, पाल्पा, रुकुम पूर्वको अस्पतालको अध्यक्षमा माओवादी केन्द्र र बांकी अस्पताल विकास समितिको अध्यक्षमा कांग्रेस लगायत अन्य दलका कार्यकर्तालाई अध्यक्ष बनाइएको छ । अध्यक्षहरुको नियुक्तिबारे मुख्यमन्त्री तथा मन्त्रिपरिषद्को कार्यालय र सम्वन्धित अस्पताललाई बोधार्थ पठाईएको छ ।

त्यसैगरी प्यूठान अस्पतालको अध्यक्षमा सुवास केसी, रोल्पा अस्पतालमा शेरबहादुर थापा, गुल्मी अस्पतालमा ढुण्डिराज पोख्रेल, रामपुर अस्पताल पाल्पामा श्यामकान्त खनाल, अर्घाखांची अस्पतालमा लिलाधर बस्याललाई अध्यक्षमा मनोनित गरिएको छ ।