खोज

नवलपुर, २४ असोज ।

पुर्वी नवलपुरको कुनै समय विकट रहेको कुमसोत अहिले पर्यटकको गन्तव्य बन्दै गएको छ । नवलपरासी पुर्व नवलपुरको देवचुली नगरपालिका–६ मा अवस्थित कुमसोत पर्यटकका लागि नयाँ गन्तव्य बन्दै गएको छ ।

देवचुली, कावासोती र हुप्सेकोट गरी तीन पालिकालाई जोड्ने यो स्थानमा हिजो आज दैनिक रुपमा भ्रमणमा पुग्ने बाह्य तथा आन्तरिक पर्यटकको संख्या बढ्दो रहेको छ । पूर्व पश्चिम राजमार्गदेखि करिब ९ किलोमिटर उत्तरमा कुमसोत अवस्थित रहेको छ ।

राजमार्ग देखि नजिकको पहाडी क्षेत्रका रुपमा रहेको यहाँबाट नवलपुरको उत्तरतर्फ रहेका पहाडी भूभाग, जिल्लाकै अग्लो स्थान देवचुली डाँडो, दक्षिणतर्फ नवलपुरको समथर भूभाग, राजमार्ग आसपासका घना बस्ती सहज रुपमा अवलोकन गर्न सकिने भएकाले पनि अहिले पर्यटकको आवगमनमा वृद्धि भएको देवचुली नगरपालिकाका नगर प्रमुख हरि प्रसाद न्यौपानेले बताए ।

यसका साथै चितवनका भूभाग, चितवन राष्ट्रिय निकुञ्ज, नारायणी नदी, राप्ती नदीको मनोरम दृश्य समेत सहज रुपमा अवलोकन गर्न सकिने भएकाले कुमसोत आन्तरिक तथा छिमेकी जिल्लाका पर्यटकको गन्तव्य बन्दै गएको उनले बताए । देवचुली नगरपालिकाको दुर्गम गाउँ भनेर चिनिने यहाँ सडक, विद्युत, खानेपानीको उपलब्धताले यहाँको विकासमा टेवा पुर्याएको देवचुली नगरपालिका वडा नम्बर ६ का वडाअध्यक्ष मिनबहादुर सोती मगरले बताए ।

विकासका विभिन्न पूर्वाधार निर्माणले यसको विकासमा सहयोग पुग्यो, राजमार्गको सहजता र क्रमशः सुविधाजनक होटलहरू खुल्न थालेपछि विस्तारै धेरै पर्यटकको रोजाइमा कुमसोत पर्न थालेको वडाअध्यक्ष सोतीको भनाई छ । आन्तरिक पर्यटकहरू गर्मीको समयमा गर्मी छल्नका लागि पनि कुमसोत पुग्ने गरेका छन् । बिदाको दिन तथा चाडपर्वको समयमा कुमसोतमा उल्लेख्य रुपमा आन्तरिक पर्यटक आउने गरेको वडाअध्यक्ष सोतीले बताए । नजिकै रहेको कीर्तिपुरमा मगर कला संस्कृति जगेर्ना गर्ने, कुमसोत कीर्तिपुर हुँदै नवलपुरको अग्लो पहाड जाने बाटोको स्तरोन्नती गर्ने योजनाका साथ काम अघि बढाइएको छ ।

प्राकृतिक मनोरम स्थल भएकाले यसलाई पर्यटनसँग जोड्ने र पर्यटनलाई आर्थिक उपार्जनसँग जोड्दै जाने आफूहरूको योजना रहेको उनले बताए । कुमसोत र जिल्लाकै अग्लो डाँडो देवचुलीको काखमा बुलिङटार र हुप्सेकोट पर्ने कीर्तिपुरको विकासको प्रमुख आधार पर्यटन हुन सक्ने भएकाले सोही अनुसारका कामहरू वडा तथा नगर स्तरबाट बढाउँदै लैजाने वडा अध्यक्ष सोतीले बताए । पालिका भित्रको प्रमुख पर्यटकीय स्थलका रुपमा देवचुली डाँडो पर्ने र यो सँगै जोडिएका कुमसोत र कीर्तिपुरमा समेत पर्यटनको प्रचुर सम्भावना भएकाले नगरस्तरबाट यस क्षेत्रमा थप पूर्वाधार विकास लगायतका काम अघि बढाउँदै लैजाने नगर प्रमुख हरिप्रसाद न्यौपानेले बताए । कुमसोतलाई जिल्लाको पहाडी क्षेत्रको प्रवेशद्वारका रुपमा समेत लिइन्छ । यही स्थान हुँदै जिल्लाको पहाडी क्षेत्रमा पर्ने पालिकाहरू बौदीकाली गाउँपालिकाको केही वडाहरू पुग्न सकिन्छ । जिल्लाको तराई क्षेत्र र पहाडी क्षेत्रलाई जोड्ने स्थलको रुपमा समेत रहेको कुमसोतमा पर्यटकको आगमन बढ्दै आफूहरु उत्साहित बनेको वडा अध्यक्ष सोतीले बताएका छन् ।