खोज

प्रधानमन्त्री पुष्पकमल दाहाल (प्रचण्ड) १५ दिने विदेश सयर गरेर स्वदेश फर्किएकै दिन शनिवार राती नेपाल आयल निगमले पेट्रोल, डिजेल, मट्टीतेल, खाना पकाउने ग्याँस र हवाइ इन्धनको भाउ बढायो । निगमले खाना पकाउने ग्याँसमा एकैपटक २१५ रूपैयाँ बृद्धि गरेर उपभोक्तामाथि गंभीर खेलवाड ग¥यो । यसअघि एलपी ग्याँसमा एकैपटक यतिधेरै अनुपातमा कहिल्यै मूल्यबृद्धि भएको थिएन । शनिवार राती गरिएको भारी मूल्यबृद्धिको नागरिकस्तरबाट भएको चर्को विरोध सरकारले थेग्न सकेन । लगत्तै आईतवार विहान मन्त्रिपरिषद बैठक बसेर आयल निगमलाई मूल्य फिर्ता गर्न निर्देशन दियो । बढेको मूल्य फिर्ता लिएपनि प्रधानमन्त्री प्रचण्ड नेतृत्वको सरकार नेपाली जनताको समस्याप्रति कत्तिपनि जवाफदेही छैन् । चाडपर्व नजिक आईरहेको बेला महंगी यति बढेको छ कि उपभोक्ता बजार जानै नसक्ने अवस्था आएको छ । हरेक बस्तुमा भएको बृद्धिले नेपाली उपभोक्तामाथि ठूलो भार परेको छ । त्यसैपनि अहिले नेपाली भान्सा महंगो भएको छ ।

निगमले शनिवार मूल्य बढाउँदा मूल्य अभिवृद्धि करको प्रभाव एवं हालसालै लागू भएको पेट्रोलियम पदार्थ तथा ग्याँसको स्वचालित मूल्य प्रणाली कार्यविधि–२०८० अनुसार आइओसीले पठाएको मूल्यमा नेपाली बजारको भाउ तय गरिएको दावी गरेपनि यसमा सरकारको गैरजिम्मेवारी छरपष्ट देखिएको छ । ग्याँस र पेट्रोलियमको मात्रै होइन खाद्यान्न लगायतका उपभोग्य बस्तुको मूल्य यति बढेको छ कि जनतालाई महंगीबाट बचाउने काममा सरकार उदासीन देखिएको छ । सवाल पेट्रोलियमको मूल्य बृद्धि मात्र होइन । चिन्ताको कुरा के छ भने राजनैतिक दलका नेताहरू समेत यसरी लगातार हरेक बस्तुको मूल्य बढ्दा तैचुपमैचुप छ । नेताहरूको मुखबाट जनता महंगीबाट आक्रान्त भएकोले मूल्य स्थीर राख्ने विषयमा सरकारलाई सचेत बनाएको कहिल्यै सुन्न पाईदैन् । अर्को चिन्ताको बिषय हो– विद्यार्थी आन्दोलन कमजोर हुनु । पहिले मूल्यबृद्धि हुँदा विरोधमा सडक तताउने विद्यार्थी संगठन अहिले मौन छन् । त्यसै त बजारमा दैनिक उपभोग्य वस्तुको अभाव छ । सामानमा कालोबजारी भएको छ भने हरेक बस्तुको भाउ अस्वाभाविकरूपमा बढेको छ । मुल्य नियन्त्रण सरकारको दायित्व हो तर उपभोक्ताको हितलाई ध्यानै नदिई मूल्य बढेको बढ्यै छ । त्यसै त ठूला उद्योग कारखाना वन्द हुँदै गएका छन । यो गंभीर विषयमा सरकारको ध्यानाकर्षण हुनुपर्ने हो ।

बजारमा अहिले कुनैपनि बस्तुको मूल्य छोइनसक्नु छ । नेपाली जनता महंगीको मारमा पर्दा समेत सरकार रमिते वन्नु दुःखद विषय हो । नेपालीका दुई ठूला चाड दशैं र तिहार नजिक आएका छन । ठिक यही बेला महंगी बढेको छ, त्यसले सरकारमाथि प्रश्न उत्पन्न भएको छ । यो सरकार जनताको समस्याप्रति साँच्चै बेखबर र उदासिन छ । जवाफदेही बन्न सकेको छैन । यस्तो लाग्दैछ– सरकारले नेपाली जनतालाई अरू केही राहत दिन त सकेन, चाडपर्वको समयमा महंगी नै उपहार दिएको छ ।