खोज

लमही, ९ असोज । स्थानीय तहका प्रमुख, उपप्रमुख तथा सदस्यहरूले पाउने सुबिधा भन्दा वढी इन्धन प्रयोग गर्दै आएका छन । स्थानीय पालिकाका प्रमुख उपप्रमुख तथा सदस्यहरूले पाउने सुविधा विधेयक २०७६ मा उल्लेख भन्दा वढी अत्याधिक मात्रामा मासिक इन्धन प्रयोग गरेको पाइएको छ ।

लमही नगरपालिकाका मेयर र उपमेयरले सो विधेयक उल्लेख भए भन्दा मासिक रूपमा ५० लिटर बढी इन्धन प्रयोग गरेको देखिएको छ । स्थानीय तहका प्रमुख तथा उपप्रमुखको इन्धन सेवा वमोजिम स्थानीय पालिकाका प्रमुख तथा उपप्रमुखले मासिक रूपमा १ सय २० लिटर डिजेल सेवा पाउने प्रावधान रहेको छ । लमही नगरपालिकाका मेयर जोगराज चौधरी र उपमेयर लक्ष्मी योगीले ऐनमा भए भन्दा झण्डै ५० लिटर डिजल मासिक रूपमा प्रयोग गर्दै आएको लमही नगरपालिका सूचना तथा संचार शाखाले दिएको प्रमुख तथा उपप्रमुखको वार्षिक इन्धन विवरणले जनाएको छ ।

आर्थिक वर्ष २०७९/८० मा मेयर चौधरीले वार्षिक रूपमा २ हजार ३ सय ६ लिटर र उपमेयर योगीले २ हजार १ सय ५९ लिटर डिजेल (इन्दन ) प्रयोग गरेको नगरपालिका सूचना तथा संचार शाखाका सूचना अधिकृत नरेन्द कुमार गुप्ताले बताए । यद्यपी मेयर चौधरी र उपमेयर योगीले ऐनमा उल्लेखित इन्धन सेवा वापत जम्मा १ हजार ४ सय ४० लिटर डिजल सुविधा पाउँछन । चौधरीले ८ सय ६३ र योगीले ७ सय १० लिटर लिटर डिजेल वढी प्रयोग गरेको देखिन्छ ।