खोज

दाङ, १२ भदौ ।

तुलसीपुर उपमहानगरपालिका वडा नम्बर १९ छिल्लीकोटमा प्याराग्लाइडिङको परीक्षण गरिएको छ । ऐतिहासिक, धार्मिक एवम् पर्यटकीय स्थल छिल्लीकोटको गुरुदेवी पैयाँटाकुरा र छिल्लीकोट दरबार क्षेत्रको पहाडबाट आइतबार र सोमबार प्याराग्लाइडिङ परीक्षण गरिएको हो । जीप लाइन निर्माणाधीन अवस्थामै रहेको छिल्लीकोटमा अर्को साहसिक खेल प्याराग्लाइडिङको सफल परीक्षण गरिएको छ ।

पाइलट कृष्णबहादुर क्षत्रीले छिल्लीकोटको क्षेत्र भौगोलिक र वातावरणीय हिसाबले उपयुक्त रहेको बताए । उनले व्यावसायिक रुपमा उडान भर्नका लागि पहाडमा उडान स्थल बनाउनुपर्ने बताए । उनले प्याराग्लाइडिङ उडानपछि भित्री सक्राम, स्यालापानी खोला किनार र श्रीचौरमा अवतरण गरिएको हुँदा ती ठाउँहरूका जग्गा दर्ता प्रक्रियाका लागि सम्बन्धित निकायसँग प्रस्ताव राखिने बताए ।

व्यवसायी बाबुराम घिमिरेले परीक्षण सफल भएको र आवश्यक प्रक्रिया पूरा गरेर व्यवसायीरुपमा दर्ता गरिने बताए । परीक्षण सफल भएकाले यो स्थान प्याराग्लाइडिङका लागि उपयुक्त भएको बताए । पोखरामा अन्तर्राष्ट्रिय विमानस्थल निर्माण भएपछि त्यहाँको सराङकोटबाट हुँदै आएको प्याराग्लाइडिङको उडानमा प्रतिबन्ध लगाइएपछि त्यहाँ व्यवसाय सञ्चालन गर्दै आएका युवा समूहले नयाँ ठाउँको खोजी अन्तर्गत छिल्लीकोटमा परीक्षण उडान गरिएको बताए ।

पोखरामा एउटा उडानको लागि यात्रुले १२ हजारसम्म तिर्नुपर्ने भए पनि दाङमा पहिलो सुरूआत भएको हुँदा त्योभन्दा कम शुल्कमा उडान गर्न सकिने उनले बताए ।

तुलसीपुर उपमहानगरपालिका वडा नम्बर १९ का वडाध्यक्ष प्रेमनाथ योगीले आफ्नो वडामा परीक्षण उडानका लागि अनुमति दिएको बताए । त्यस क्षेत्रमा जीप लाइन समेत निर्माणको अन्तिम चरणमा पुगेको र प्याराग्लाइडिङ परीक्षण सफल भएपछि पर्यापर्यटनको क्षेत्रमा नयाँ उर्जा थपिएको बताए ।

उनले परीक्षण सफल भएसँगै त्यहाँको साहसिक खेल पर्यटनमा वृद्धि हुने अपेक्षा गरिएको बताए । व्यावसायिक रुपमा उडान गर्नका लागि आवश्यक सहयोग गरिने बताए ।

तुलसीपुर उपमहानगरपालिका पर्यटन शाखाका प्रमुख झरेन्द्र खरेलले विगतमा तुलसीपुर उपमहानगरपालिकाको वडा नम्बर ३ थर्कोट डाँडामा परीक्षण गरिएको स्मरण गरे । छिल्लीकोटमा गरिएको साहसिक उडान परीक्षणका लागि पालिकाबाटै अनुमति र राजश्व तिरेर काम बढाउनुपर्ने बताए । प्याराग्लाइडिङको परीक्षण उडान भएको देखेर पर्यटक आउने आशामा स्थानीय खुशी भएका छन् ।