खोज

कपिलवस्तु, ११ भदौ ।

प्राचीन कपिलवस्तु दरबार (तिलौराकोट) को विकासलाई लुम्बिनी विकास कोषका उपाध्यक्ष डा. ल्यारक्यार लामा (प्रथम योल्मो खेन्पो छिमे छिरिङ) ले विशेष चासोका साथ हेरेका छन् । नियुक्त भएपछि शुक्रबार कपिलवस्तुका बुद्धस्थल अवलोकनका लागि आएका उपाध्यक्ष लामाले आइतबार पुनः तिलौराकोट दरवारको अवलोकन गरेका छन् । तिलौराकोट दरबारलाई प्रस्तुतीयोग्य बनाउन आवश्यक रहेको उनले बताए । अहिले झाडी नै झाडी रहेको दरबार क्षेत्रमा झाडी सफाईका लागि उनले पहल शुरु गरेका छन् । तिलौराकोट दरबारमा आउने बुद्धमार्गी र पर्यटकका लागि न्युनतम आधारभुत सुविधा उपलब्ध गराउनु पर्नेमा उनको विशेष चासो छ ।

झाडी सरसफाई गर्नका लागि वर्षा रोकिने बित्तिकै काम अगाडि बढाउन उनले नेपाली सेना सँग समन्वय गरेका छन् । सेनाको जनशक्ति प्रयोग गरि दरबारमा सरसफाई शुरु गर्न उपाध्यक्ष लामाले शमसेर दल गण गोरुसिङ्गेका प्रमुख सेनानी दिलिप घले सँग दरबार क्षेत्रको भ्रमण गर्दै सरसल्लाह गरेका हुन् । कोषले दुई साता पछि नेपाली सेनालाई सरसफाईका लागि आवश्यक जनशक्ति पठाईदिन पत्राचार गर्नेछ ।

कोषको पत्राचार अनुसार मुख्यालयको स्विकृती लिएर गणले सरसफाईका लागि सेनाको टोली खटाउने छ । गणबाट खटिने जनशक्ति सरसफाईको कार्यमा लाग्ने छ भने बाँकी आवश्यक पर्ने सफाईका सामग्री र जनशक्तिका लागि आवश्यक पर्ने खाना खाजाको व्यवस्थापन कोषले गर्नेछ ।

दरबार परिसर सरसफाईपछि बुद्धमार्गी र लामा गुरुहरुले यहाँ आएपछि २०÷२५ स्थानमा लुङ्गदा राख्न मिल्ने गरि दरबार परिसरलाई व्यवस्थापन गरिने छ । तिलौराकोट आउने बुद्धमार्गी र लामाहरुका लागि लुङ्गदा राख्ने र धुप बाल्ने व्यवस्था गर्न, रुखहरु मुनी बस्न मिल्ने काठको संरचना बनाउन आवश्यक रहेको उपाध्यक्ष लामाले बताए ।

त्यसैगरी दरबार परिसर बाहिर एउटा गुम्बा र दरबार भित्र अस्थायी रुपमा बुद्धको मुर्ति राख्न सकिए लामा गुरुहरुलाई प्रशन्नता मिल्ने उनले जानकारी दिए । कोषका सदस्य सचिव सानुराजा शाक्य, परिषद सदस्य गोपीकृष्ण शर्मा, योजना प्रमुख सरोज भट्टराईसँग उपाध्यक्ष लामाले अब तिलौराकोटलाई प्रस्तुतीयोग्य बनाउन र यहाँ आउने बुद्धमार्गीलाई समय व्यतित गर्न मिल्ने गरी संरचना बनाउन आवश्यक रहेको बताए ।

“तिलौराकोटको विकास भन्दा भन्दै धेरैको कार्यकाल बित्यो । हामीले अहिले नै कामहरु अगाडि बढाएनौ भने हाम्रो पनि कार्यकाल त्यसै बित्छ” उनले भने । उपाध्यक्षको तिलौराकोट प्रतिको चासोले तिलौराकोटको विकास सार्थक हुने बिश्वास रहेको तथा स्थानीयको अपेक्षा पुरा हुनेमा आशावादी रहेको कोषका परिषद सदस्य गोपीकृष्ण शर्माले बताए ।