खोज

बुटवल (बुटवलटुडे), २७ साउन– रुस र युक्रेन युद्ध अहिले पनि जारी छ । युद्धको कारण धरासायी हँुदै गएको युक्रेनबाट शान्तीको कामना सहित लुम्बिनी आउने पर्यटकहरूको संख्या समेत बृद्धि भएको पाइएको छ ।आफ्नो देशमा शान्तीको कामना सहित पूजाआजा गर्नको लागि शान्ती भूमि लुम्बिनी आउने पर्यटकहरूको संख्या यो बर्ष वृद्धि भएको लुम्बिनी विकास कोषले जनाएको छ ।

युक्रेन रुस युद्धका कारणले पनि शान्ति खोज्दै शान्तिभूमि लुम्बिनी भ्रमणमा आएको पाइएको हो । यसको अलवा लुम्बिनीमा थाईल्याण्ड, श्रीलंका, म्यानमार, साउथ कोरिया र चिन रहेका छन । यसका साथै जर्मनी र फ्रान्सबाट समेत पर्यटकहरू लुम्बिनी भ्रमणमा आएका छन । बुद्धजन्मस्थल लुम्बिनीमा पर्यटकको आवागमन बृद्धि हुँदै गएकाले सन् २०२३ को अन्तिमसम्म २० प्रतिशतसम्म बृद्धि हुनसक्ने अनुमान गरिएको छ ।
बुद्धजन्मस्थल लुम्बिनीमा पर्यटक आवागमन बृद्धि हुँदै गएको छ । कोभिड महामारीपछि भारी मात्रामा कटौती भएको विदेशी पर्यटकको संख्या पछिल्लो एक वर्षमा निकै उत्साहजनक रूपमा बृद्धि भएको छ । लुम्बिनी विकास कोषको सूचना शाखाका अनुसार सन् २०२३ को जुलाई महिनासम्म नेपाली, भारतीय र अन्य मुलुकका गरि ५ लाख ६० हजार ३ सय २५ जनाले लुम्बिनी भ्रमण गरेका छन् । गत वर्ष सन् २०२२ मा जुलाई महिनासम्म ४ लाख ६५ हजार ९ सय ७९ जना पर्यटक लुम्बिनी आएका थिए ।

यो हिसाबले गत वर्षभन्दा ९४ हजार ३४६ बढि पर्यटकले लुम्बिनी भ्रमण गरेको तथ्यांकले देखाएको छ । गत वर्षको तुलनामा यो वर्ष लुम्बिनी भ्रमण गर्ने पर्यटकको संख्या उत्साहजनक रूपमा बृद्धि भएको कोषका सूचना तथा जनसम्पर्क अधिकृत डा. हरिध्वज राईले जानकारी दिए । उनले नेपाली, भारतीयसँगै सबैभन्दा बढि तेस्रो मुलुकका पर्यटकहरूको आवागमन बृद्धि भएको देखिएको बताए । उनका अनुसार गत वर्ष जुलाईसम्म नेपाली पर्यटकले ३ लाख ५५ हजार पर्यटकले लुम्बिनी भ्रमण गरेकोमा यो वर्ष त्यो संख्या बृद्धि भएर ३ लाख ७९ हजार पुगेको छ ।

त्यस्तै गत वर्ष भारतीयहरू पर्यटकको संख्या १ लाख ६ हजार भएकोमा यो वर्षको जुलाईसम्म १ लाख ४३ हजारले भ्रमण गरिसकेको अधिकृत राईले बताए । कोभिड महामारीपछि सबैभन्दा निकै कम मात्रामा आएका पासपोर्टधारी पर्यटक अर्थात नेपाल र भारत बाहेकका पर्यटकको संख्या यो वर्ष निकै उत्साहप्रद रूपमा बृद्धि भएको सूचना अधिकृत राईले बताए । उनका अनुसार गत वर्ष जुलाईसम्म ३ हजार ९ ७५ पर्यटकले लुम्बिनी पाईला टेकेकोमा यो वर्ष संख्या हवात्तै बृद्धि भएर ३६ हजार ९९७ पुगेको छ । यो ८ सय ३० प्रतिशले बृद्धि भएको हो । कोभिडको समयमा विश्व घुम्न नपाएकाहरू बिस्तारै भ्रमणमा निस्कन थालेकाले पर्यटक संख्या बृद्धि भएको उनको भनाई छ ।