खोज

नवलपुुर, १४ असार ।

पूर्वी नवलपरासीका चार नगरपालिका र चार गाउँपालिकाको आर्थिक वर्ष २०८०।०८१ को वार्षिक नीति तथा कार्यक्रम र बजेट सभाबाट पारित भएको छ ।

केन्द्र सरकारले बजेट कम दिएपछि यहाँका पालिकाकाले सरकारले प्रदान गर्ने बजेटको तुलनामा ३० प्रतिशत सम्म बढीको बजेट तर्जुमा गरेका छन् । गैंडाकोट नगरपालिका देवचुली, कावासोती र मध्यबिन्दू नगरपालिका र विनयी त्रिवेणी, हुप्सेकोट, वौंदीकाली र बुलिङटार गाउँपालिकाले बिहीबार आर्थिक वर्ष २०८०।०८१ को वार्षिक नीति तथा कार्यक्रम र बजेट पारित गरेको जनाएका छन् ।

नगरपालिकाले शिक्षालाई निःशुल्क, सर्वशुलभ बनाउँदै लैजाने, स्वास्थ्यको पहुँच हरेक वर्गमा सजिलै पुर्याउने बजेट तर्जुुमा भएको देवचुली नगरपालिकाका नगरप्रमुख हरिप्रसाद न्यौपानेले बताए ।

चार नगरपालिका र चार गाउँपालिकाले आर्थिक वर्ष २०८०।०८१ को बजेट सार्वजनिक गरी पारित गरेका हुन् । ती स्थानीय तहले चालुु तर्फ ६० देखि ६३ प्रतिशत सम्म र विकास बजेटतर्फ ३७ देखि ४० प्रतिशत बिनियोजन गरेका छन् । देवचुली नगरपालिकाले आर्थिक वर्ष २०८०।०८१ को लागि रु ९० करोड १२ लाख १८ हजारको बजेट सार्वजनिक गरेको छ । सरकारले रु ५१ करोड र बाँकी खोला ठेक्का करबाट जम्मा हुने गरी बजेट सार्वजनिक गरेको नगरप्रमुख न्यौपानेले बताएका छन् ।

गैंडाकोट नगरपालिकाले रु एक अर्ब एक करोड ४२ लाख ७८ हजारको बजेट सार्वजनिक गरी पारित गरेको छ भने बजेटमा करीब ६८ प्रतिशत चालु र ३२ प्रतिशत विकास बजेट विनियोजन गरिएको प्रमुख अधिकारीले बताए ।

मध्यबिन्दु नगरपालिकाले रु ९० करोड १३ लाख ३६ हजारको बजेट सार्वजनिक गरेको छ । साथै विनयी त्रिवेणी गाउँपालिकाले रु ६७ करोडको बजेट सभा समक्ष पेश गरेको पालिकाका अध्यक्ष घनश्याम गिरीले बताए । कावासोती नगरपालिकाले ९३ करोडको बजेट पारित गरेको छ ।

हुप्सेकोट गाउँपालिकाका अध्यक्ष लक्ष्मी पाण्डेले हुप्सेकोट गाउँपालिकाले शिक्षा, स्वास्थ्य, कृषि र पशुलाई यो वर्ष बजेटमा ठुलो रकम छुट्याएकाले पालिकाले सशर्त अनुदान सहित ५२ करोड ११ लाख ४३ हजारको आयब्ययको बजेट पारित भएको बताए ।

मध्यबिन्दु नगरपालिकाले कृषि र शिक्षा स्वास्थ्यलाई उच्च प्राथमिकतामा राख्दै बजेट बिनियोजन गरेका नगरप्रमुख भीमलाल अधिकारीले बताए । बौदीकाली गाउँपालिकाले बाटो निर्माण र स्वास्थ्यलाई उच्च प्राथमिकतामा राखेर आगामी वर्षको बजेट पारित गरेको अध्यक्ष प्रकाश ओझाले बताए । पालिकाले झण्डै ४२ करोडको बजेट सार्वजनिक गरेको अध्यक्ष ओझाले जानकारी दिएका छन् ।

बुलिङटार गाउँपालिकाले ४० करोडको बजेट सार्वजनिक गर्दै कृषि, सडक निर्माण, खानेपानी, ढल निकास शिक्षालाई मुख्य प्राथमिकतामा राखेर बजेत पारित गरेको पालिकाका अध्यक्ष दिपेन्द्र सुुनारीले बताए ।

पूर्वी नवलपरासीमा रहेका पालिकाले शिक्षा, स्वास्थ्य, कृषि, पशुपंक्षी साथै सडक निर्माणलाई पहिलो प्राथमिकतामा राखेर आगामी आर्थिक वर्ष २०८० ।८१ को वार्षिक नीति तथा कार्यक्रम र बजेट सार्वजनिक गरी सभाबाट पारित गरिसकेका छन् ।