खोज

बुटवल, ४ असार ।

बुटवल उपमहानगरपालिकाले अभिमुखीकरण कार्यक्रम सञ्चालन गर्न थालेपछि महिलाहरु स्वरोजगार बन्न थालेका छन् । महिलालाई आत्मनिर्भर बनाउन उपमहानगरले महिला अभिमुखीकरण कार्यक्रम सञ्चालन गरिरहेको छ ।

महिलाहरुका लागि जुत्ता बनाउने तालिम, विद्यार्थीलाई सहकारी तालिम, फाइबर झोला बनाउने तालिम, सिकाइ कटाइ तालिम, टपरी बनाउने तालिम, छाकलको सामग्रीहरू बनाउने तालिम, आलु चिप्स बनाउने तालिम, हलुका सवारी चालक, अटोमेकानिक्स तालिम सञ्चालन गरी महिलाहरुलाई आत्मनिर्भर र स्वरोजगार बन्न प्रेरित गरिएको हो ।

स्वरोजगार तालिम लिएकी बुटवल–८ सुख्खानगरकी हरिकला थापाले आफूले पाँच दिन आलु चिप्स बनाउने तालिम लिएको बताउँदै यसबाट आफूलाई आत्मनिर्भर बन्न सहयोग मिलेको बताइन् । “स्वरोजगारमूलक तालिममार्फत सीप सिक्न पाउँदा खुसी लागेको छ, अव व्यावसायिक रुपमा अगाडि बढाउने सोंच बनाएकी छु”–उनले भनिन् ।

बुटवल उपमहानगरपालिकाले अहिलेसम्म ८१ जनालाई आवश्यक सिलाइ मेसिन, आरन, अन्य उपकरण हरु उपलब्ध गराएको छ । सीपमूलक तालिम लिएकी बुटवल–१२ की मिश्रा थापाले तालिमबाट आफूले नयाँ अनुभव हासिल गरेको बताइन् । उनले छाकलको सामग्रीहरु बनाउने तालिम लिएकी थिइन् । १५ दिनको यो तालिममा ३४ जनाको सहभागिता रहेको थियो । “तालिममार्फत सिकेको यो सिपले धेरै आत्मबल बढेको छ, छाकलबाट व्याग, टोपी, फुलदानी, टोकरी, डटपेन स्ट्यान्ड आदि चिजहरू बनाइएको छ । यी सामग्रीहरू हालसम्म उपहारको रुपमा दिइएको छ । अब बिस्तारै बजारमा ल्याउने हो”–उनले भनिन् । उनले आफूले उत्पादन गरेका यी सामग्रीले बजार पाउने आशा लागेको बताइन् । “जंगलबाट छाकलका पातहरू ल्याएका छौं डोरीहरु बाँधिएको छ, टोकरीको भने हलको फिनिसिङ हुन बाँकी छ”– उनले भनिन् ।

त्यस्तै बुटवल उपमहानगरले सञ्चालन गरेको आलु चिप्स बनाउने तालिममा सहभागी शोभा बस्यालले तालिमबाट आत्मनिर्भर बन्नसहयोग पुगेको बताइन् । सिकेको सीपलाई ब्यावसायिक रुपमा अगाडि बढाउन बुटवल उपमहानगरपालिकाबाट कटिङ मेसिन, कढाइ, झाँझर, बांटा, त्रिपाल आदि सामानहरु सहयोग पाइएको भन्दै उनले खुसी व्यक्त गरिन्

उपप्रमुख महिला विकास कार्यक्रम अन्तर्गत वडा नं. १४ मा ३ महिने सिलाई कटाई कार्यक्रम भइरहेको छ । जसमा २० जनाको सहभागिता रहेको छ । त्यस्तै ३ महिने बुकी तालिम चौराहामा जारी रहेको छ । जहाँ १ वडा देखि १९ वडा सम्मका महिला सहभागी छन् । त्यस्तै १५ दिनको ड्राइभिङ पुनर्ताजगी लाइसेन्स, ब्राइडल मेकअप १५ दिनको १ देखि १० नं. वडाका बासिन्दालाई, सिल्पकला तालिम वडा नं. ४ र ६ मा सञ्चालन गैरहेको छ । बुटवल उपमहानगरपालिकाकी उप मेयर सावित्रा अर्यालले उपमहानगरले महिलाहरुलाई लक्षित गर्दै विभिन्न सीपमूलक तालिमको व्यवस्थापन गर्दै आएको बताइन् ।

“महिलाहरुलाई स्वरोजगार बनाएर आत्मनिर्भर बनाउनु हाम्रो लक्ष्य हो, यसतर्फ केन्द्रित भएर तालिमहरु सञ्चालन गरिरहेका छौं”–उनले भनिन् ।