खोज

दाङ, १९ जेठ ।

घोराही उपमहानगरपालिका सामाजिक विकास महाशाखा तथा रोजगार सेवा केन्द्रको आयोजना र नेपाल सरकार तथा स्वीटजरल्याण्ड सरकारको द्विपक्षीय परियोजना– दिगो तथा सम्मानित रोजगारीका लागि सीप( दोश्रो चरणको सहयोगमा एक दिने वृत्ति मार्गनिर्देशन तथा रोजगार मेला दाङको घोराहीमा शुक्रबार आयोजना गरिएको छ । मेलको उदघाटन गर्दै जिल्ला समन्वय समिति दाङका प्रमुख नित्यानन्द शर्माले नेपालका युवा रोजगारीका लागि बाहिर जानुपर्ने बाध्यताको अन्त्य गर्नका लागि मेलाले सहयोग गर्ने बताए । उनले रोजगार दिन चाहने र रोजगारलिन चाहनेको बिचमा भेट गर्ने अबसर भएकाले यो कार्यक्रम निकै फलदायी हुने बताए । आफ्नै देशमा रोजगार गर्ने वतावरणको सृजना हुने आशा गरे ।

कार्यक्रममा प्रमुख जिल्ला अधिकारी सुशील बैद्यले देशका युवा जनशक्ति अध्ययनपश्चात स्वदेशमा रोजगारी खोज्नु वा उद्योगधन्दा खोल्नका लागि मेला फलदायी हुने बताए । दक्ष जनशक्ति पलायन हुने क्रम रोक्नका लागि बृत्ति मार्गनिर्देशन तथा रोजगार मेलाबाट रोजगारदातालाई आवश्यकताअनुसारको जनशक्ति उपलब्ध हुने बिस्वास रहेको प्रजिअ बैद्यले बताए । रोजगारीकै खोजीमा युवा शक्तिलाई विदेशिनु पर्ने बाध्यताको अन्त्य गर्न मद्दत पुग्ने बिस्वास लिएको उनको भनाइ छ ।

मेलामा विद्यार्थी तथा युुवाहरुलाई वृृत्ति परामर्शको सेवा प्रदान गर्ने तथा रोजगारीको खोजीमा रहेका यूवा जनशक्ति र रोजगारदातालाई एकै स्थानमा ल्याई आ–आफ्नो आवश्यकताअनुसारको जनशक्ति खोज्न र रोज्न सहयोग पु¥याउने घोराही उपमहानगरपालिकाका प्रमुख नरुलाल चौधरीले जानकारी दिए । प्राविधिक, प्रशासनिक क्षेत्रका व्यक्तिका साथै श्रमिक वर्गको समेत सहभागिता रहने मेलामा उद्योग÷व्यवसायलगायत अन्य क्षेत्रका रोजगारदाताको पनि प्रतिनिधित्व हुने उनले बताए ।

रोजगार मेलामा वृत्तिविकास सम्बन्धी परामर्श सेवा तथा जानकारी दिइने, सीपमूलक तालिम दिने संस्थाहरुको प्रदर्शनी र तालिमबारे जानकारी दिइने, रोजगार सम्बन्धी सूचना दिइनुका साथै रोजगारदातासँग प्रत्यक्ष सम्पर्क गराइने, निःशुल्क सञ्चालन हुने कार्यस्थलमा आधारित सीपमूलक तालिम सम्बन्धी जानकारी दिइने, रोजगारको अवसर प्राप्त गर्न सकिने र स्थानीय उत्पादनहरु प्रदर्शनी गरिने कार्य्रक्रम तय भएको नगरप्रमुख चौधरीले जानकारी दिए ।

घोराही उपमहानगरपालिकाका उपप्रमुख हुमा डिसीले आफ्नो माटो र घरपरिवारसंँग बसेर काम गर्ने वातावारणको सिर्जना गर्न खोजेको बताइन् । कक्षा ११, १२ को परीक्षा सकेको विद्यार्थी बाहिर जाने सपना नदेखेर यही सीप सिकेर रोजगार गर्नुपर्नेमा जोड दिइन् ।

कार्यक्रममा पत्रकार महासंघका अध्यक्ष दुर्गालाल केसीले युवा जनशक्ति रोजगारीको लागि भौतारिनु नपर्ने र आफ्नो क्षमता र रुचि अनुसारको रोजगार मिल्ने बताए । कार्यक्रममा घोराही उपमहानगरपलिकाका प्रवक्ता राममणि पाण्डे, उद्योग बाणिज्य संघका अध्यक्ष टंकसिंह बुढाथोकी लगायतले आफ्नो भनाई राखेका थिए । मेलामा स्थानीय स्तरमा उत्पादन भएका सामग्रीका र रोजगारदाताकागरी ४० स्टलहरु रहेका छन् ।