खोज

बुटवल, ८ जेठ ।

दुग्ध व्यवसायमा अस्वस्थ प्रतिष्पर्धाका साथै बजारमा न्यून गुणस्तरको दुधको बिक्री वितरण भईरहेकोले त्यसलाई व्यवस्थित गर्नुपर्नेमा जोड दिईएको छ । बुटवल उद्योग वाणिज्य संघ रुपन्देहीको आयोजना तथा संघ अन्तर्गत गठित डेरी वस्तुगत समितिको संयोजनमा बुटवलमा भएको अन्तत्र्रिmया कार्यक्रममा उक्त कुरामा जोड दिईएको हो ।

दुग्ध तथा दुग्धजन्य वस्तुको उत्पादन, वितरण प्रक्रियामा हुने गुणस्तर ह्रास तथा व्यावसायिक मापदण्ड कार्यान्वयनको अभावले मूल्य र त्यसको गुणस्तरमा सामन्जस्यता नमिलेको व्यवसायीहरु बताउँछन् । त्यस्तै बाटोबाटोमा दुधको खुद्रा बिक्री वितरणले दुधको गुणस्तरमा गिरावट आउनुको साथै त्यस्ता व्यवसायीका कारण मापदण्ड पालना गरेर व्यवसाय गरेका व्यवसायीलाई समेत असर गरेको उनीहरुको भनाई छ ।

त्यसरी बिक्री वितरण हुने दुधमा गुणस्तरमा ह्रास आउनुको साथै जनस्वास्थ्यमा समेत असर गर्ने बताएका थिए । उपभोक्तलाई स्वच्छ र स्वस्थकर दुध तथा दुग्धजन्य उत्पादनको परिपूर्तिका लागि नियमनकारी निकायले कडाईका साथ मापदण्ड कार्यान्वयन गर्नुपर्ने बुटवल उद्योग वाणिज्य संघका अध्यक्ष उज्ज्वलप्रसाद कसजू बताउँछन् । उनले अस्वस्थ प्रतिष्पर्धा गर्ने व्यवसायीका कारण मापदण्ड अनुसार सञ्चालन भएका व्यवसायलाई चुनौती भएको बताउँदै सम्बन्धित व्यवसायीहरु एकजुट भएर मापदण्ड कार्यान्वयनको लागि पहल गर्न पनि सुझाव दिए ।

कार्यक्रममा बोल्दै बुटवल उपमहानगरपालिका शिक्षा, स्वास्थ्य तथा वित्त महाशाखा प्रमुख मित्रमणी खनालले बजारलाई व्यवस्थित गर्नको लागि नगरपालिकाले काम गरिरहेको बताए । उनले दुधको गुणस्तर, खाद्य ऐन, अनुगमन, व्यवसाय दर्ता, मापदण्ड लगायतका बारेमा पनि जानकारी गराए ।

कार्यक्रममा बोल्दै डेरी वस्तुगत समितिका सभापति गणेशसिंह भण्डारीले विना दर्ता व्यवसाय गरिरहेका व्यवसायीलाई दर्ताको प्रक्रियामा आउन र मापदण्ड पालना गर्न आग्रह गरे । नेपाल डेरी एशोसिएशनका थानेश्वर न्यौपाने, व्यवसायीहरु गोपाल पौडेल, जीवलाल न्यौपाने लगायतले व्यवसायीका समस्या तथा चुनौतीहरुको बारेमा जानकारी गराएका थिए ।

त्यस्तै संघका कार्यसमिति सदस्यहरु वसन्तप्रसाद ढकाल, उपभोक्ता हित संरक्षण मञ्च रुपन्देहीका अध्यक्ष समुन्द्र जिसी, लुम्बिनी दुग्ध वितरण आयोजनाका प्रमुख योगेश्वर शाह, खाद्य प्रविधि तथा गुण नियन्त्रण कार्यालय भैरहवाका कार्यालय प्रमुख विमलकुमार दाहाल लगायतले मापदण्डको पालना गर्दै मर्यादित व्यवसाय सञ्चालनको लागि आग्रह गरे ।