खोज

बुटवल, २६ चैत ।

आर्थिक समस्या ब्यहोरेका रुपन्देहीका पेशा ब्यवसायको पलायन रोक्न सरकारीस्तरबाट नीतिगत पहल थाल्नुपर्ने एक कार्यक्रममा बोल्ने वक्ताहरुले सुझाव दिएका छन । कोभिड संक्रमण र आर्थिक समस्याको पिडामा रहेका ब्यवसायीहरुलाई घरबहाल, सेवाशुल्क लगायतमा छुटका नीतिगत पहल गर्नुपर्ने उनीहरुले सुझाव दिए । रुपन्देही मिष्ठान्न क्याटरिङ तथा पार्टी प्यालेस ब्यवसाय संघले नयाँ वर्ष २०८० को शुभकामना आदानप्रदान तथा भित्तेपात्रो विमोचन कार्यक्रममा बोल्ने वक्ताहरुले उपभोक्ताको हितसंगै ब्यवसाय प्रवद्र्धनमा ध्यान दिनुपर्ने बताए ।

कार्यक्रममा नेपाल पार्टी प्यालेस तथा क्याटरिङ ब्यवसायी महासंघका उपाध्यक्ष हरि न्यौपाने, बुटवल उपमहानगरपालिका वडा नं. ३ का वडाअध्यक्ष बिष्णु ढकाल, संघका अध्यक्ष लक्ष्मण पोखरेल, होटल तथा रेष्टुरेन्ट ब्यवसायी संघका अध्यक्ष लेखनाथ भण्डारी, संघका संस्थापक अध्यक्ष घनश्याम पाण्डे, संस्थापक सचिव राजेन्द्र भट्टराई, नवलपरासी क्याटरिङ तथा टेन्ट ब्यवसायी संघका अध्यक्ष ध्रुव पंगेनीले विमोचन गरेका छन् ।

कार्यक्रममा नेपाल पार्टी प्यालेस तथा क्याटरिङ ब्यवसायी महासंघका संस्थापक कोषाध्यक्ष तथा सल्लाहकार प्रभाकर पण्डितले ब्यावसायिक संस्थामा राजनीतिक गन्ध रोक्नुपर्ने सुझाव दिए । गुणस्तरीय वस्तु, मूल्यको एकरुपता, बदनियता ब्यवसायको कारण उत्पन्न हुने समस्या रोक्ने अभियान महत्वपूर्ण हुने उनले बताए । सरकारको मिष्ठान्न ब्यवसायलाई हेर्ने दृष्टिकोण परिवर्तन गराउने रुपमा महासंघ स्थापना गरिएको उनले बताए ।

मिष्ठान्न तथा क्याटरिङ ब्यावसाय धेरै संवेदनशिल पेशा भएकाले सचेतना अपनाउनुपर्ने समेत सुझाव दिए । कार्यक्रममा बुटवल उपमहानगरपालिका वडा नं. ३ का वडाअध्यक्ष विष्णु ढकालले देशको समग्र आर्थिक अवस्था कमजोरसंगै यसको चपेटामा रुपन्देहीका धरासायी हुने अवस्थामा पुगेको पेशा ब्यवसायलाई रोक्ने गरी पहल थाल्नुपर्ने बताए । घरबहाल छुटदेखि उपभोक्ताको हितको पक्षमा सरोकारवाला निकायहरु पहल गर्न सुझाव दिए ।

यसैबीच होटल तथा रेष्टुरेन्ट ब्यवसायी संघका अध्यक्ष लेखनाथ भण्डारीले पेशाप्रतिको वफादारिता कायम गर्दै सेवाग्राहिको हितमा रहेर काम गर्नुपर्ने बताए । ब्यापारिक क्षेत्रहरु धरासायी हुनबाट रोक्न कम लागि सरकारबाट आवश्यक नीतिगत पहल थाल्नुपर्ने उनले बताए । घर बहाल अहिलेको सबैभन्दा चुनौती बनेको भन्दै पारदर्शी हुने गरी पहल थाल्नुपर्ने उनले सुझाव दिए ।

कार्यक्रममा संस्थापक सचिव राजेन्द्र भट्टराईले संस्था दर्ताको क्रममा प्रशासनबाट धेरै नकारात्मक प्रश्नहरु आएको स्मरण गर्दै मिष्ठान्नको गुणस्तर र उपभोक्ताको हितमा ध्यान दिनसक्दा अहिलेको सफलता हात पारेको दाबी गरे । मिष्ठान्नलाई उद्योगका रुपमा गुणस्तर र मापदण्डमा ध्यान दिनुपर्ने उनले बताए । मिष्ठान्न ब्यवसायी भगवानको प्रसाद तयार गर्ने भएकाले शुद्धता जरुरी रहने उनले बताए । चाडपर्वको बेला खुला सिमा नाकाका कारण अखाद्य मिठाईहरु ल्याउने काम रोक्न संस्थागत रुपमा पहल गरेको उनले बताए ।

कार्यक्रममा संस्थापक अध्यक्ष घनश्याम पाण्डे, नवलपरासी क्याटरिङ तथा टेन्ट ब्यवसायी संघका अध्यक्ष ध्रुव पंगेनी, संघका अध्यक्ष लक्ष्मण पोखरेल, संघका सचिव बलराम पौडेलले स्वदेशी उद्योगलाई प्रोत्साहन गर्ने गरि अभियान थाल्नुपर्ने सुझाव दिए । हाल रुपन्देहीमा १ हजार बढी मिष्ठान्न तथा क्याटरिङ ब्यवसायीहरु छन ।