खोज

बुटवल, ४ फागुन ।

देवदहमा जारी खड्ग प्रसाद गौचन स्मृति पाँचौ यु–१९ राष्ट्रिय क्रिकेट प्रतियोगितामा समूह ‘बि’ तर्फ मदन भण्डारी स्पोर्टस एकेडेमी आफ्नो पहिलो खेलमा विजयी भएको छ । बिहिबार भएको खेलमा मदन भण्डारीले न्यु होराईजन क्रिकेट एकेडेमीलाई ६ विकेटले पराजित गरेको हो ।

देवदह क्रिकेट मैदान शितलनगरमा भएको खेलमा टस जितेर न्यु होराईजनले २१.२ ओभरमा सबै बिकेट गुमाएर १ सय २ रनको लक्ष्य खडा गरेको थियो । न्यु होराईजनका आरिफ खानले ३५ बलमा ३५ रन तथा अंकित बिएमले १७ बलमा १८ रनको योगदान दिए । कम स्कोरमा रोक्न मदन भण्डारीका सागर भण्डारीले ५ ओभरमा १६ रन खर्चेर १ मेडलसहित ३ विकेट लिए । यसैगरी अदिप्सन नेपालीले ३ ओभरमा १४ रन खर्चेर २ बिकेट लिए ।

मध्यम लक्ष्यलाई मदन भण्डारीका ब्याट्सम्यानहरुले २१.१ ओभरमा ४ विकेटको नोक्सानीमा लक्ष्य भेटाए । मदन भण्डारीको जितमा अवानिस कुमारले अर्धशतक पुरा गरे । उनले ५९ बलमा ५४ रनको योगदान दिए । यसैगरी मनिष तिवारीले ३० बलमा १४ रन बनाए । न्यु होराईजनका अमर मिश्रले २ तथा सुमिद पराजुलीले १ विकेट लिए । खेलमा मदन भण्डारीका सागर भण्डारी म्यान अफ द म्याचबाट पुरस्कृत भए ।

यसैगरी समूह ‘ए’ को अन्तिम खेलमा सेन्टर क्रिकेट एकेडेमी कास्की विजयी भएको छ । सेन्टरले स्टार क्रिकेट एकेडेमीमाथि ४७ रनको जित निकालेको हो । सेन्टरका सिब्रिन श्रेष्ठ म्यान अफ दी म्याचबाट पुरस्कृत भए । प्रतियोगिता अन्तर्गत शुक्रबार समूह ‘बि’ को न्यु होराईजन एकेडेमी र क्रिकेट एक्सेलेन्स सेन्टर काठमाडौ तथा धनगढी क्रिकेट एकेडेमी र मदन भण्डारी स्पोटर््स एकेडेमीका बीचमा खेल हुने छ ।