खोज

बुटवल, ३ फागुन ।

देवदहमा जारी खड्ग प्रसाद गौचन स्मृति पाँचौ यु–१९ राष्ट्रिय क्रिकेट प्रतियोगितामा भैरहवाको काशी नोबेल एकेडेमीले समुह ‘ए’ को विजेता र देवदह क्रिकेट क्लब उपविजेता बन्दै अन्तिम चारमा स्थान बनाएको छ । काशी नोबेलले समूहमा लगातार तीन खेलमा तथा देवदहले २ खेलमा जित निकाल्यो । बुधबार भएको पहिलो खेलमा काशी एकेडेमीले सेन्ट्रल क्रिकेट एकेडेमी, कास्कीमाथि १ सय १० रनको फराकिलो जित तथा दोस्रो खेलमा देवदह क्रिकेट क्लबले स्टार क्रिकेट एकेडेमी माथि १९ रनको जित निकालेको थियो ।

देवदह क्रिकेट मैदान शितलनगरमा भएको पहिलो खेलमा टस जितेर काशीले निर्धारित २५ ओभरमा २ सय १ रनको बिशाल लक्ष्य खडा गरेको थियो । काशीका विजय प्रजापतिले शानदार अर्धशतक पूरा गरे । उनले ३२ बलमा ५४ रन बनाए । यसैगरी समिर अलिले ४३ बलमा ४६ तथा बिशाल भुषालले ३४ बलमा ४० रनको योगदान दिए । सेन्ट्रलका सोहिल कुँवरले ५ ओभरमा ४७ रन खर्चेर २ विकेट लिए । विशाल लक्ष्य पछ्याएको सेन्ट्रलका ब्याट्सम्यानहरु २० ओभरमा सबै विकेट गुमाएर ९० रनमा समेटियो । सेन्ट्रलका सिबरिन श्रेष्ठले ४१ बलमा २० रन तथा नितिन छन्त्यालले नटआउट १० बाहेक अन्य ब्याट्सम्यानले दोहोरो रन जोड्न सकेनन । कम स्कोरमा रोक्न काशीका सन्तोष यादवले ४ ओभरमा ३ रन खर्चेर १ मेडनसहित ३ बिकेट लिए । काशीका विजय प्रजापति म्यान अफ द म्याचबाट पुरस्कृत भए ।

यसैगरी दोस्रो खेलमा टस जितेर देवदह क्रिकेट युनिटले निर्धारित २५ ओभरमा ९ विकेट नोक्सानीमा १ सय ४२ रनको लक्ष्य खडा गरेको थियो । देवदहका सर्वोत्तम सुनारले आफनो अर्धशतकी पारी पूरा गरे । उनले ६१ बलमा ६८ रन तथा क्षितिज थापा मगरले १६ बलमा २८ रनको योगदान दिएका थिए । स्टारका प्रतिक क्षेत्रीले ५ ओभरमा २७ रन खर्चेर ३ तथा अवजित ज्ञवालीले ५ ओभरमा १६ रन खर्चेर १ मेडलसहित २ विकेट लिए । मध्यम लक्ष्य पछ्याएको स्टारका ब्याट्सम्यान २४.१ ओभरमा सबै बिकेट गुमाएर १ सय २३ रनमा समेटियो । स्टारका लागि अस्मान थारुले २७ बलमा २६ तथा मन्दन चाइले २७ बलमा २४ रनबाहेक अन्य ब्याट्सम्यान क्रिजमा टिक्न सकेनन । कम स्कोरमा रोक्न देवदहका संकित भट्टराईले ५ ओभरमा १९ रन खर्चेर ३ तथा सुरज खड्काले ५ ओभरमा २० रन खर्चेर १ मेडलसहित २ बिकेट लिए । खेलमा देवदहका सर्वोत्तम सुनार म्यान अफ दी म्यानबाट पुरस्कृत भए ।
प्रतियोगिताको बिहिबार समुह ‘ए’को अन्तिम खेलमा सेन्टर क्रिकेट एकेडेमी कास्की र स्टार क्रिकेट एकेडेमी तथा समुह ‘बि’ को न्यु होराईजन एकेडेमी र मदन भण्डारी स्पोट्र्स एकेडेमीका बिचमा खेल हुने छ ।