खोज

बुटवल, १ फागुन ।

रुपन्देहीको गैडहवा गाउँपालिकामा चौथो गैडहवा राष्ट्रपति रनिङ शिल्ड प्रतियोगिता सोमबारदेिख सुरुवात भएको छ ।

स्वास्थ्यका लागि खेलकुद, राष्ट्रका लागि खेलकुद भन्ने नाराका साथ जिल्लाको गैडहवा गाउँपालिकामा पालिकास्तरीय चौथो राष्ट्रपति रनिङ शिल्ड प्रतियोगिता, २०७९ सुरु भएको हो । खेल वडा नं. ६ को सुर्यपुरा बौमुखी क्याम्पसको खेलमैदानमा सुरू भएको हो । खेलको शुभारम्भ रुपन्देही क्षेत्र नं. ५ का संघीय सांसद बासुदेव घिमिरेले उदघाटन गरेका हुन् ।

घिमिरेले पालिकास्तरमा आयोजना हुने यस्ता खेलले खेलाडी पहिचान र राष्ट्रिय एवम अन्तर्राष्ट्रिय स्तरका खेलाडी उत्पादनमा टेवा पुर्याउने बताए । खेलले खेलाडी उत्पादनमा मात्र नगरी शारीरिक स्वास्थ्यका लागि पनि महत्वपूर्ण भूमिका खेल्ने बताउँदै क्षेत्र नं. पाँच भित्र कृषिको लागि मलखाद गौशाला निर्माणको लागि आफू लागि परेको बताउँदै कार्यक्रम र विद्यार्थी खेलाडीहरूको अग्रिम बिजयीको शुभकामना व्यक्त गरे ।

लुम्बिनी प्रदेश सांसद भूमिश्वर ढकालले प्रतियोगिता हार र जित नभई मित्रता बढाउन र खेलाडीहरूमा रहेका प्रतिभा देखाउने रास्ट्रपति रनिङ शिल्ड प्रतियोगिताको आयोजना गरिएको बताउँदै खेलमा सम्पूर्ण सहभागी बिद्यालयलाई जितको शुभकामना दिए ।

निवर्तमान गाउँपालिका अध्यक्ष बच्चुलाल केवट वडाअध्यक्ष बिजय शर्मा वडाअध्यक्ष मिना थापा विभिन्न राजनीतिक दलका प्रमुख प्रतिनिधि लगायतले कार्यक्रममा बोल्दै खेलकुदमा उत्कृष्ट खेल प्रदर्शन गर्न खेलाडीलाई शुभकामना दिंदै राष्ट्रपति रनिङ शिल्ड प्रतियोगिताले जिल्लास्तरीय खेलकुद प्रतियोगितामा विद्यार्थीहरुलाई सहभागी हुन मद्दत पुग्ने बताए ।

कार्यक्रममा गाउँपालिकाका प्रमुख प्रशासकीय अधिकृत कृष्ण पन्थीले खेलकुद विद्यार्थीहरुको लागि अपरिहार्य रहेको बताउँदै कार्यक्रम सफलताको शुभकामना दिए । गाउँपालिका अध्यक्ष सुरेन्द्र पौडेल, शिक्षा शाखा प्रमुख माधव पौडेललगायतले राष्ट्रपति रनिङ शिल्ड प्रतियोगिताले बिद्यार्थीको खेलकुद विकासलाई सकारात्मक टेवा पुग्ने बताउँदै गाउँपालिकाले गौरवका योजना गैडहवा ताल यशोधरा पार्क गौशाला लगायत गाउँपालिकाले अगाडि बढाएको बताए । कार्यक्रममा बीचबीचमा विद्यार्थीहरुले नृत्य प्रस्तुत गरेका थिए ।