खोज

बुटवल, ६ माघ ।

विद्यालयस्तरका भलिबल खेलाडीहरुको प्रतिभा प्रस्फुटन गराउने उदेश्यका साथ रुपन्देहीमा माविस्तरिय छात्रछात्रा भलिबल प्रतियोगिता सुरु भएको छ । एभरेष्ट बोर्डिङ स्कुलको आयोजनामा शुक्रबारदेखि आठौ जिल्लास्तरीय अन्तर मावि एभरेष्ट भलिबल कप छात्रछात्रा भलिबल प्रतियोगिता २०७९ सुरु भएको हो । प्रतियोगिताको एक समारोहका बीच प्रदेश खेलकुद विकास परिषद लुम्बिनीका सदस्य सचिव जयप्रकाश भट्टराईले प्रतियोगिताको उद्घाटन गर्दै एभरेष्ट स्कुल नेपालकै भलिबल खेलको विकासमा महत्वपूर्ण योगदान दिएको बताए । सरकारबाट गरिनुपर्ने खेल क्षेत्रको विकासमा निजी क्षेत्रबाट भएका लगानी र योगदानप्रति विशेष आभार ब्यक्त गर्दै प्रदेश समन्वय गरी अघि बढ्न तयार रहेको बताए । राष्ट्रिय स्तरको खेलाडी तयार हुन विद्यालय स्तरमा खेल गतिविधि जरुरी रहने भन्दै यसमा ध्यान दिन जरुरी रहेको उनले बताए ।

कार्यक्रममा विद्यालयका प्राचार्य कृष्ण न्यौपानेले निजी विद्यालयलाई हेर्ने दृष्टिकोण परिवर्तन गर्नुपर्ने सुझाव दिदै अध्ययन अध्यापनसंगै खेलकुद गतिविधिमा आफुहरु अगाडि रहेको दाबी गरे । खेलकुदले विद्यार्थीहरुको शारीरिक, मानसिक र अनुशासित बनाउन समेत मद्दत मिल्ने भन्दै उनले विधागत रुपमा प्रशिक्षकको नियुक्ति गरेर विभिन्न खेलमा नियमित प्रशिक्षण दिदै आएको बताए । ‘स्थानीय, जिल्लामा मात्र नभई राष्ट्रिय स्तरकै खेलाडीहरु उत्पादन गर्न सफल भएका छौ’– उनले भने ।

कार्यक्रममा राष्ट्रिय महिला टिमको प्रशिक्षक जगदिश भट्टले ३ दशकदेखि देशको भलिबल खेलको विकासमा निरन्तर आफू अग्रसर रहेको बताए । राष्ट्रिय खेल भलिबलको विकास र खेलाडीहरुलाई प्रोत्साहन गर्ने लक्ष्यमा विद्यालयको अभियान निक्कै उदाहरणीय भएको बताए । कुनाकन्दरामा लुकेर रहेका प्रतिभाहरुलाई खोजेर प्रशिक्षण दिई प्लेटफर्मका रुपमा विकास गराउन विद्यालय सफल भएको समेत उनले बताए । खेलकुद केवल खेल र खेलाडी बन्नेमात्र नभई एउटा स्वस्थ्य नागरिक निर्माण गर्न समेत महत्वपूर्ण हुने उनले दाबी गरे ।
कार्यक्रममा अभिभावक महासंघका केन्द्रीय सदस्य लोकनाथ ज्ञवालीले गुणस्तरीय शिक्षा कायम राख्दै जिल्लामा भएका विद्यालयका विद्यार्थीहरुका बिचमा भाईचारा विकास गराउने उदेश्यका साथ आयोजना गरिएको प्रतियोगिताको सफलताको शुभकामना दिए ।

एभरेष्ट बोर्डिङ स्कुलको भलिबल कोर्टमा भएको उद्घाटन खेलमा मणिमुकुन्द माबि विजयी भएको छ । मणिमुकुन्दले देवदह माबिलाई २–० को सोझो सेटमा पराजित गर्दै दोस्रो चरणमा प्रवेश गरेको हो। पहिलो सेट २५–९ तथा दोस्रो सेट २५–१९ को अंकले जित्दै मणिमुकुन्द दोस्रो चरणमा प्रवेश गरेको हो ।

प्रतियोगिताको उपाधि विजेतालाई नगद २० हजार रुपैयाँ, कप, मेडल, प्रमाणपत्रबाट पुरस्कृत गरिने छ । यसैगरी उपविजेता टिमलाई नगद १५ हजार रुपैयाँ, कप, मेडल, प्रमाणपत्र तथा तृतीय टिमलाई नगद १० हजार रुपैया, रुपैयाँ, कप, मेडल, प्रमाणपत्रबाट पुरस्कृत गरिने खेल संयोजक अर्जुन घिमिरेले बताए । प्रतियोगितामा छात्रतर्फ १९ र छात्रातर्फ १० टिमले भाग लिएको संयोजक घिमिरेले बताए ।

कार्यक्रममा विद्यालयका सहप्राचार्य भिमसेन गौतम, जिल्ला भलिबल संघका उपाध्यक्ष लोकेन्द्र भण्डारी, स्कुलका अध्यक्ष गम बहादुर रेश्मीले विद्यालय शैक्षिकमात्र नभई विद्यार्थीहरुको अन्तरनिहित प्रतिभालाई प्रस्फुटन गराउने गरी खेलकुदमा योगदान गरेको बताए । अघिल्लो संस्करणमा छात्रतर्फ मणिमुकुन्द र छात्रातर्फ आयोजक एभरेष्ट बोर्डिङ स्कुल विजयी भएका थियो ।