खोज

सुनवल, २ माघ ।

पश्चिम नवलपरासीको सुनवलस्थित महाकवि देवकोटा नमुना माध्यमिक विद्यालयमा नगरस्तरीय दोस्रो राष्ट्रपति रनिङ्ग शिल्ड खेलकुद प्रतियोगिता हुने भएको छ । अगामी बुधवारदेखि तीन दिन सम्म चल्ने प्रतियोगिताको आवश्यक तयारी अन्तिम चरणमा पुगेको सोमबार विद्यालयमा आयोजित पत्रकार सम्मेलनमा जानकारी दिईएको छ ।

सुनवलका सामुदायिक र संस्थागत गरी ५५ वटा विद्यालयका विद्यार्थीले भाग लिने प्रतियोगितामा १७ ओटा विधामा छात्रछात्राका लागि छुट्टाछुट्टै ३४ वटा खेल हुने देवकोटा माविको विद्यालय व्यवस्थापन समितिका अध्यक्ष ज्ञानहरी अर्यालले जानकारी दिए । राष्ट्रपति रनिङ्ग शिल्ड अन्तर्गत भलिबल, विभिन्न दुरीको दौड, हाई जम्प, लङ्ग जम्प, ट्रिपल जम्प, सटपुट, कबड्डी, ज्याभ्लिन थ्रो, तेक्वादो, कराँते लगायतका खेल हुने छन् । ३ हजार मिटर दुरीको दौड सुनवल–परासी सडक खण्डमा हुने छ भने बाँकी सबै खेल विद्यालयकै परिसरभित्र हुने विद्यालयका प्रधानाध्यापक तथा खेल संयोजक खेमराज जोशी शर्माले जानकारी दिए । राष्ट्रपति रनिङ्ग शिल्ड प्रतियोगिताको ंसशेधित निर्देशिका अनुसार १८ वर्ष पुरा नभएका कक्षा १२ सम्मका विद्यार्थीले प्रतियोगितामा भाग लिन पाउँछन् । प्रतियोगिता सम्पन्न गर्न विभिन्न १६ ओटा उपसमिति बनाएर तयारी तीव्र पारिएको छ ।

यसैबीच प्रतियोगितालाई थप आर्कषक बनाउन सांस्कृति कार्यक्रम र खाना महोत्सव (फुड फेस्टिबल) को पनि आयोजना गरिएको छ । विद्यालयमा होटल म्यानेजमेन्ट पढ्ने विद्यार्थीहरुको क्षमतालाई प्रष्फुटन गर्न पनि फुड फेस्टिबलको अवधारणा ल्याईएको विद्यालयले जनाएको छ । प्रतियोगितामा सहभागी खेलाडीलाई खाना नास्ताको लागि पनि विद्यालय बाहिर जाँदा समस्या हुने भएकाले फुड फेस्टिबलको माध्यमबाट विद्यालय परिसर भित्रै खानाको व्यवस्था गरिने आयोजकले जनाएको छ । साथै स्थानीय कलाकार र विद्यार्थीले विविध सांस्कृति कार्यक्रम पनि प्रतियोगिताको दौरान प्रस्तुत हुने छ । खाना महोत्सव र सांस्कृतिक कार्यक्रमले प्रतियोगीलाई हौसला मिल्नुका साथै विद्यालयलाई समुदायसँंग जोड्न सघाउ पुग्ने अध्यक्ष अर्यालले विश्वास व्यक्त गरे ।

सो क्रममा बोल्दै पत्रकार महासंघ नवलपरासीका अध्यक्ष हरि शर्मा, सुनवल ४ का वडा अध्यक्ष बालकृष्ण पंगेनीले बालबालिकामा भएको अन्तरनिहित क्षमता प्रष्फुटन गरी खेलाडी उत्पादन गर्न यस्ता प्रतियोगिता महत्वपूर्ण हुने बताए ।