खोज

बुटवल, २९ पुस ।

लुम्बिनी प्रदेशस्तरीय दोस्रो ‘सि’ लेभल तथा भेट्रान्स खुला आशिष कप ब्याडमिन्टन प्रतियोगिता २०७९ शुक्रबार सुरु भएको छ । युनेक्स, सनराइन, ईनास ईन्टरप्राईजेजको सहयोगमा आशिष स्पोर्ट्स एण्ड म्युजिक सेन्टर, आशिष स्टेशनरीको मुख्य प्रायोजक तथा लायन्स क्लब अफ बुटवल स्टारको आयोजनामा भएको प्रतियोगिताको एक समारोहका बीच लुम्बिनी प्रदेश पुर्वस्वस्थ्यमन्त्री भोज प्रसाद श्रेष्ठले उदघाटन गरेका छन । स्वस्थ्य र खेलकुद दुई सिक्काका पाटा भएको र आम नागरिकको लागि अति आवश्यक हुने भन्दै उनले स्वस्थ्य समाजका लागि खेलकुद जरुरी रहने बताए । दीर्घकालिन योजनासहित खेल पुर्वाधारमा तीन तहकै सरकार लाग्नुपर्ने सुझाव दिदै प्रदेशमा शुरु भएका धेरै खेल परियोजना अन्यौलतामा रहेको भन्दै यसमा सरोकारवालाहरुको ध्यान जानुपर्ने बताए ।

तिलोत्तमा नगरपालिकाको बुटवल वाटरपार्कको कवर्ड हलमा पहिलो दिनको ३० वटा खेलहरु सकिएका छन । यसैबीच उद्घाटन खेलमा लाफा समूह बिबेक न्यौपाने र मनोज फौदार तथा कपिलबस्तुका सोभिन श्रेष्ठ र अभय महराका बिच सो म्याच गरिएको थियो । कार्यक्रममा डिष्ट्रिक ३२५ पि का फष्ट भ्वाईस डिष्ट्रिक गर्भनर अर्जुनमान सैजु, प्रदेश खेलकुद परिषद लुम्बिनीका सदस्य सचिव जयप्रकाश भट्टराई, जिल्ला खेलकुद विकास समितिका अध्यक्ष भुपेन्द्र क्षेत्री (हरि), राजु बास्तोला, आयोजक आशिष स्टेशनरीका संचालक आयुषकृष्ण श्रेष्ठले खेल विकासमा जिल्लामा हुने प्रतियोगिताहरु महत्वपूर्ण हुने बताए ।

क्लबका अध्यक्ष विजय कुमार वर्नवालले युवा खेलाडीलाई प्लेटफर्म दिने उद्देश्यका साथ प्रतियोगिता आयोजना गर्दै आएका बताए । दुई ईभेन्टमा हुने प्रतियोगितामा मेन्स डबल्सको उपाधि विजेताले नगद ३२ हजार रुपैयाँ, उपविजेताले नगद २२ हजार रुपैया र तृतिय दुई टिमले जनही नगद १६ हजार रुपैया, कप, मेडल र प्रमाणपत्र प्राप्त गर्ने छन । यसैगरि भेट्रान्स डबल्स ४५ वर्षमाथिको उपाधि विजेताले नगद २० हजार रुपैयाँ, उपविजेताले नगद १५ हजार रुपैयाँ तथा तृतीय दुई टिमले जनही नगद १० हजार रुपैयाँ, कप, मेडल, प्रमाणपत्रबाट पुरस्कृत गरिने उनले बताए । प्रतियोगिताको टप आठमा पुग्ने टिमलाई समेत पुरस्कृत गरिने उनले बताए । प्रतियोगितामा सी लेभल खुलामा ८४ टिम र भेट्रान्सतर्फ ३२ टिमले प्रतिस्पर्धा गरिरहेको संयोजक दुर्गा आलेले बताए ।