खोज

दाङ, २६ पुस ।

लुम्बिनी प्रदेशस्तरीय प्रंधानमन्त्री कप महिला क्रिकेट छनौट प्रतियोगिता अन्तर्गतको फाईनल खेलमा दाङ ७ रनले पराजित भएको छ । दाङको घोराही १७ गुलरियास्थित घोराही क्रिकेट रंगशालामा पुस २३ गतेदेखि आजसम्म भएको छनौट प्रतियोगितामा गत वर्षको विजेत रुपन्देहीले दाङलाई फाईनलमा ७ रनले हराउन सफल भएको छ ।

९५ रनको विजयी लक्ष्यका साथ जवाफी ब्याटिङ गरेको दाङले विकेट रोक्न नसक्दा हार ब्यहोर्न पुगेको छ । दाङका लागि शुरुवाती ब्याटर लक्ष्मी चौधरीले रनको आशा जगाउँदै ५ बलमा १० रन बनाएर खेलिरहेका बेला विभाष्ना बिसीको बलमा क्याच आउट भएपछि दाङले लय समात्न सकेन ।

कप्तान सरस्वती जिएमले ५२ बल खेल्दै अविजित २३ रन बनाएपनि जीतका लागि पर्याप्त हुन सकेन । कमला जिएमले १२ बलमा ६, मधु डिसीले १३ बलमा १३, अनिता चौधरीले २० बलमा १५, प्रभा चौधरीले ७ बलमा ३ तथा अमृता अधिकारी र आशा चौधरीले १–१ रन बनाएपनि अरु खेलाडीले खाता नै खोल्न सकेनन् । ७२ रन ब्याटबाट बनाएको दाङले १५ रन अतिरिक्त पाउँदै ८७ रनमा रुपन्देहीले फाईनल जितेको हो ।

रुपन्देहीकी कप्तान कृतिका मरासिनीको कसिलो बलिङ सामु दाङको टीम धरासायी बन्यो । छनौट प्रतियोगितामा मरासिनीले उत्कृष्ट प्रदर्शन गरेकी थिइन् । मंगलबारको खेलमा पनि चार ओभरमा २ मेडन राख्दै जम्मा ६ रन दिएर महत्वपूर्ण चार विकेट लिएपछि दाङले फाईनलमा हार व्यहोरेको हो । यस्तै, विभाष्ना बिसीले चार ओभरमा १५ रन दिएर २ विकेट लिँदा सरु तिवारीले पनि पुरै स्पेल गरेर १७ रन दिएर १ विकेट लिइन् । सुस्मिता भुसाल र कविता खड्का विकेटविहीन हुँदै क्रमशः २५ र १९ रन दिइन्् ।

यसअघि टस जितेर पहिले ब्याटिङ गरेको रुपन्देहीले पुरै ओभर खेल्दै ६ विकेटको क्षतिमा ९४ रन बनाएको थियो । रुपन्देहीका ओपनर श्रुति बुढाथोकी र विभाष्ना बिसीले २० रन बनाउदै खेलि रहेका बेला अनिता चौधरीले आफ्नो पहिलो ओभरको चौथो बलमा श्रुतिलाई क्याच आउट गराएपछि सात दशमलव ४ ओभरमा रुपन्देहीले पहिलो विकेट गुमाएको थियो ।

रुपन्देहीका लागि विभाष्ना बिसीले ३३ बलमा खेल्दै सर्वाधिक २५ रन बनाएकी थिइन् । श्रुतिले ३४ बलमा १० रन बनाउँदा कृति सेनले १० बलमा ५ रनको योगदान दिइन् ।

यसैगरी, आशा मगरले १७ बलमा १५ रन बनाउँदा कप्तान कृतिका मरासिनीले १४ बलमा ११ रन, सरु तिवारीले ४ बलमा २ रन बनाइन् । सुस्मिता भुसालले ६ बलमा अविजित १ रन बनाइन् । रुपन्देहीले १८ रन अतिरिक्त पाएको थियो भने ब्याटबाट ७६ रन बनाउँदै ९४ रनको योगफल बनाएको हो ।

बलिङतर्फ दाङकी अनिता चौधरीले ४ ओभरमा २१ रन दिँदै महत्त्वपूर्ण ३ विकेट लिइन भने कमला जिएमले ४ ओभरमा १५ रन दिएर २ विकेट लिँदा लक्ष्मी चौधरीले ३ ओभरमा १८ रन दिँदै १ विकेट लिइन् ।
दाङकी सर्मिला रोका र मधु डिसीले १ –१ मेडन राख्दै ११ र २० रन दिँदा विकेट विहीन रहेका थिए । फाईनलमा उत्कृष्ट प्रदर्शन गर्ने रुपन्देहीकी कप्तान कृतिका मरासिनी प्लेयर अफ द म्याच हुनुसफल भइन् । प्रतियोगिताको समापन समारोहमा लुम्बिनी प्रदेशसभा सदस्य राजु खनालले खेलाडीलाई ट्रफी वितरण गरे ।

प्रतियोगितामा दाङ, बाँके, रुपन्देही र नवलपरासी गरी चार वटा जिल्लाको सहभागीता रहेको थियो । प्रतियोगितामा उत्कृष्ट प्रदर्शन गर्ने खेलाडीलाई छनौट गरी यही पुस २९ गतेबाट ईटहरीमा हुने प्रधानमन्त्री कप महिला राष्ट्रिय क्रिकेट प्रतियोगितामा सहभागी गराईने नेपाल क्रिकेट संघका लुम्विनी प्रदेश सदस्य एवं छनोट समितिका संयोजक कैलाश रोकामगरले जानकारी दिए ।

उनका अनुसार लुम्बिनी प्रदेशबाट १४ जना खेलाडी, प्रशिक्षक र टीम व्यवस्थापक तथा चार जना वैकल्पिक खेलाडी छनौट हुनेछन् । उक्त प्रतियोगितामा विभागीय टीम एपीएफसहित सात वटै प्रदेशको सहभागीता रहनेछ ।