© 2026
२१ फाल्गुन २०८२, बिहीबार
२१ फाल्गुन २०८२, बिहीबार
काठमाडौँ ।
काठमाडौँ जिल्लाको बुढानीलकण्ठ नगरपालिका–२ चपलीमा रहेको मतदान केन्द्रमा आज बिहान एक प्रेरणादायी दृश्य देखिएको छ ।
एक सय पाँच वर्षीय ज्येष्ठ नागरिक चन्द्रबहादुर खड्काले उत्साहका साथ आफ्नो मतदान अधिकार प्रयोग गर्दै सो केन्द्रमा पहिलो मतदान गरेका हुन ।
बिहान ७ः३० बजे मतदान प्रक्रिया सुरु भएसँगै उनले मतदान केन्द्रमा पुगेर पहिलो मत खसालेका हुन । ज्येष्ठ उमेरका बाबजुद पनि मतदानप्रति उनको उत्साह र प्रतिबद्धताले उपस्थित मतदाता तथा निर्वाचन कर्मचारीलाई समेत प्रेरित बनाएको छ ।
मतदानपछि सञ्चारकर्मीहरूसँग सङ्क्षिप्त प्रतिक्रिया दिँदै खड्काले मतदान गर्न पाउँदा आफू अत्यन्त खुसी भएको बताए । उनले भने, “१०५ वर्षको उमेरमा पनि आज मतदान गर्न पाउँदा निकै खुसी लागेको छ । देशले योग्य, इमानदार र जनताको हितमा काम गर्ने जनप्रतिनिधि पाओस् भन्ने मेरो कामना छ ।”
खड्काको यो सहभागिताले लोकतन्त्रप्रति नागरिकको जिम्मेवारी र कर्तव्य बोध कति महत्त्वपूर्ण हुन्छ भन्ने सन्देश दिएको स्थानीयवासी तथा सञ्चारकर्मी अनिता श्रेष्ठले बताए । मतदान केन्द्रमा उपस्थित मतदाताले उनलाई सम्मानका साथ स्वागत गरेका थिए भने धेरैले उनीसँग फोटो खिचेर यो क्षणलाई स्मरणीय बनाएका थिए । रासस
© 2026
All rights reserved.
Design & Developed By:
