खोज

बुटवल, २२ पुस ।

तिलोत्तमामा जारी तिलोत्तमा मेयर कप क्रिकेट प्रतियोगिता २०७९ मा वडा नं. ९ र वडा नं. १७ विजयी हँुदै दोस्रो चरणमा प्रवेश गरेका छन् । तिलोत्तमा नगरपालिकाको आयोजना तथा नवजिवन क्लबको सहआयोजनामा नवजिवन खेलमैदानमा भएको पहिलो खेलमा वडा नं. ९ ले वडा नं १० माथि ३९ रन तथा दोस्रो खेलमा वडा नं १७ ले वडा नं १३ माथि ५ रनको जित निकालेको हो ।

पहिलो खेलमा टस जितेर ब्याटिङको निर्णय गरेको वडा नं. ९ ले १८.२ ओभरमा सबै विकेट गुमाएर १ सय ३ रनको लक्ष्य खडा गरेको थियो । उसका लागि शुभम लम्सालले ३४, कमल अधिकारीले २३ र निशान्त शर्माले १८ रनको योगदान दिए । वडा नं. १० का प्रेम थारुले ४ र अभिषेक खड्काले ३ विकेट लिएका थिए । मध्यम लक्ष्य पछ्याएको वडा नं. १० केवल १५.३ ओभरमा ६४ रनमा समेटियो । उसका लागि जयनाथ थारुले २५ र दीपक चौधरीले ११ बाहेक अन्य ब्याट्सम्यानले दोहोरो रन बनाउन सकेनन् । कम स्कोरमा रोक्न वडा नं ९ का बिप्रसन केसी र निशान्त शर्माले समान ३–३ बिकेट लिएका थिए । खेलमा वडा नं. ९ का निशान्त शर्मा म्यान अफ दी म्याचबाट पुरस्कृत भए ।

यसैगरी दोस्रो खेलमा वडा नं. १७ ले टस जितेर ब्याटिङको निर्णय गर्दै १६ ओभरमा सबै बिकेट गुमाएर केवल ९६ रनको लक्ष्य खडा गरेको थियो । वडा नं. १७ का अजय यादवले १८ र मुमताज अहमदले ११ रनको योगदान दिएका थिए । वडा नं. १३ का कृष्ण भुसालले ४ तथा लक्ष्मण कुमालले ३ बिकेट लिएका थिए । मध्यम लक्ष्य पछ्याएको वडा नं. १३ का ब्याट्सम्यानहरु पुरै ओभरमा केवल ९१ रनमात्र बनाउन सफल भयो । उसका लागि राहुल अग्रहरीले १६ र प्रविण बिकले १३ रनबाहेक अन्य ब्याट्सम्यान दोहोरो रन जोड्न सकेनन् । कम स्कोरमा रोक्न वडा नं १७ का दिपेश चौधरी र राम शंकरले समान ३–३ विकेट लिएका थिए । खेलमा वडा नं १७ का दीपेश चौधरी म्यान अफ दी म्याचबाट पुरस्कृत भए ।
शनिबार पहिलो खेल वडा नं ४ र ५ तथा दोस्रो खेल वडा नं १ र ११ का बीचमा हुने संयोजक प्रकाश न्यौपानेले बताए ।