खोज

बुटवल, २० पुस ।

तिलोत्तमा नगरका युवा खेलाडीहरुलाई प्लेटफर्म दिने उद्देश्यका साथ क्रिकेट प्रतियोगिता सुरु भएको छ । तिलोत्तमा नगरपालिकाको आयोजना तथा नवजिवन क्लबको सहआयोजनामा बुधबारदेखि प्रथम तिलोत्तमा मेयर कप क्रिकेट प्रतियोगिता २०७९ सुरु भएको हो ।

एक समारोहका बीच तिलोत्तमा नगरपालिकाका प्रमुख रामकृष्ण खाँणले प्रतियोगिताको उदघाटन गर्दै युवा खेलाडीहरुलाई खेलमार्फत एकतावद्घ र प्रोत्साहन गर्ने रुपमा खेल गतिविधिलाई अघि बढाएको बताए । नगरमा आयोजना हुने प्रतियोगिता खेलाडी उत्पादनको आधार भएको भन्दै उनले नगरमा पूर्वाधार विकास गर्दै खेलकुद गतिविधिमा जोड दिएको बताए । ‘खेलकुद विकासमा पालिकाबाट बजेट विनियोजन गर्दै आएका छौ’– उनले भने ।
कार्यक्रममा उपप्रमुख जगेश्वरदेवी चौधरी, वडा नंं. ६ का वडाअध्यक्ष गणेश पाठक, क्लबका अध्यक्ष गोविन्द प्रसाद भुसालले नगरभित्र रहेका क्लब र संघहरुलाई जोड्दै दीर्घकालिन योजनावद्घका साथ अघि बढ्नुपर्ने बताए ।

कार्यक्रमका संयोजक प्रकाश न्यौपानेले पूर्वाधार सहितको मैदानमा क्रिकेट गतिविधिलाई जोड दिने रुपमा प्रतियोगिता गर्न लागेको बताए । प्रतियोगिताको उपाधि विजेताले नगद ५० हजार रुपैयाँ, कप, मेडल, प्रमाणपत्र तथा उपविजेता टिमले नगद २५ हजार रुपैयाँ, कप, मेडल, प्रमाणपत्रबाट पुरस्कृत गरिने उनले बताए । यसैगरी प्रतियोगिताको प्लेयर अफ सिरिजलाई नगद १० हजार रुपैयाँ, कप, प्रमाणपत्र तथा उत्कृष्ट बलर, ब्याट्सम्यान नगद ५ हजार रुपैयाँ, कप, प्रमाणपत्रबाट पुरस्कृत गरिने उनले बताए । पुस २८ गतेसम्म संचालन हुने प्रतियोगिता आयोजना गर्न ५ लाख रुपैयाँ खर्च हुने अनुमान रहेको छ ।

नवजिवन खेलमैदानमा भएको उदघाटन खेलमा वडा नं. १६ ले विजयी सुरुवात गरेको छ । वडा नं. ८ माथि ६१ रनको जित निकाल्दै वडा नं. १६ विजयी भएको हो । वडा नं. ८ ले टस जितेर फिल्डिङ गर्ने निर्णय गरेपछि ब्याटिङ गर्न मैदान छिरेका वडा नं. १६ का ब्याट्सम्यानहरुले निर्धारित २० ओभरमा ८ विकेटको नोक्सानीमा १ सय २९ रनको लक्ष्य खडा गरेका थिए । वडा नं. १६ का अनुराग थापाले ४६, शम्भु थापाले २१ रनको योगदान दिएका थिए । खेलका वडा नं. ८ का निश्चल पराजुली र राहुल भण्डारीले समान ३–३ विकेट लिएका थिए । मध्यम लक्ष्य पछ्याएको वडा नं. ८ का ब्याट्सम्यानहरु १५.१ ओभरमा ६८ रनमा समेटियो । खेलमा आकाश बराईलीले १७ र सुमन ज्ञवालीले १५ रनबाहेक अन्य खेलाडीहरुले दोहोरो रन जोड्न सकेनन् । कम स्कोरमा रोक्न वडा नं १६ का सौभाग्य बश्याल, किशन भण्डारीले समान २–२ विकेट तथा अनुराग थापाले १ विकेट लिएका थिए । खेलमा वडा नं. १६ का अनुराग थापा म्यान अफ द म्याच घोषित हुँदै पुरस्कृत भए । तिलोत्तमा नगरका वडा नं १२, १५ बाहेक वडास्तरमा १५ टिमहरु प्रतिस्पर्धा गर्ने छन । विहीबार वडा नं. २ र ७, वडा नं ६ र १४ का बीचमा खेल हुने छ ।