खोज

भैरहवा, ६ माघ ।

नेकपा एमालेबाट रुपन्देही क्षेत्र नम्बर ३ बाट आगामी फागुन २१ गते हुने प्रतिनिधि सभाको लागि वासुदेव घिमिरेले उम्मेदवारी दर्ता गराएका छन् ।  रुपन्देहीको राजनीतिमा वासुदेव घिमिरेलाई चिनाउन कुनै ठुलो भाषण आवश्यक पर्दैन ।

उनलाई चिनाउने आधार उनका निर्णय, कार्यशैली र स्थानीय तहमा गरेको अभ्यास हो । तिलोत्तमा नगरपालिकाको नेतृत्व सम्हाल्दा देखाएको व्यवस्थापकीय क्षमता हुँदै आज सङ्घीय सांसदसम्म आइपुगेका घिमिरेलाई धेरैले “काम गरेर अगाडि बढ्ने नेता” का रूपमा बुझ्छन् ।

घिमिरेको व्यक्तित्व चर्को नाराभन्दा शान्त अभिव्यक्तिमा देखिन्छ । सार्वजनिक कार्यक्रममा उनी भावनात्मकभन्दा तथ्य र व्यवहारिक समाधानमा केन्द्रित हुने गर्छन् । यही स्वभावले उनलाई स्थानीय प्रशासनमा स्वीकार्य बनायो । निर्णय गर्दा छलफल, आलोचना सुन्ने धैर्य र कार्यान्वयनमा दृढता यी विशेषता उनका सहकर्मी र स्थानीयवासीले बारम्बार उल्लेख गर्ने पक्ष हुन् ।

तिलोत्तमा नगरपालिकाको प्रमुख हुँदा घिमिरेले नेतृत्वको वास्तविक अभ्यास गरे । ती वर्षहरू उनको राजनीतिक जीवनको ‘टर्निङ प्वाइन्ट’ बने । नगर व्यवस्थापन, सहरी पूर्वाधार, सेवा प्रवाह सुधार जस्ता विषयमा उनले देखाएको सक्रियताले उनलाई स्थानीय स्तरमै स्थापित गरायो ।

आलोचना पनि आए, तर उनले त्यसलाई व्यक्तिगत रूपमा होइन, सुधारको आधारका रूपमा लिने प्रयास गरे । २०७९ सालमा नेपाली काँग्रेसका भरत कुमार शाहलाई हराउँदै रुपन्देही क्षेत्र नम्बर ५ बाट प्रतिनिधि सभा सदस्य बनेपछि घिमिरेको भूमिका फराकिलो भयो ।

तर सोच उही रह्यो—स्थानीय आवश्यकता केन्द्रमा राख्ने । संसद्मा बोल्दा पनि उनी विकास, आर्थिक सम्भावना र क्षेत्रीय पहिचानका विषयमा केन्द्रित देखिन्छन् । रुपन्देहीलाई आर्थिक गतिविधिको केन्द्रका रूपमा विकास गर्नुपर्ने धारणा उनको राजनीतिक दृष्टिकोणको मुख्य अंश हो ।

घिमिरेको नेतृत्व शैलीको अर्को पक्ष हो—पार्टीभित्र पनि आफ्नो धारणा राख्न नहिचकिचाउने स्वभाव । पछिल्ला दिनहरूमा पार्टी नेतृत्व र कार्यशैलीप्रति असन्तुष्टि व्यक्त गर्दै जिम्मेवारीबाट अलग हुने सङ्केतले उनलाई चर्चामा ल्यायो ।

तर अन्ततः संवाद र आत्म समीक्षामार्फत पार्टीमै रहने निर्णयले उनको व्यक्तित्वको अर्को पक्ष देखायो टकराब भन्दा समाधान खोज्ने नेता । घिमिरे आफैँलाई ‘सांसदभन्दा पहिले जनप्रतिनिधि’ भन्न रुचाउँछन् । भेटघाट, छलफल र स्थानीय कार्यक्रममार्फत जनतासँग सम्पर्कमा रहने उनको प्रयास निरन्तर देखिन्छ।

समर्थकहरु भन्छन्, “उहाँ बोल्नेभन्दा सुन्ने नेता हुनुहुन्छ ।” वासुदेव घिमिरेको राजनीतिक यात्रा अझै पूर्ण भएको छैन । स्थानीय तहबाट सिकेको नेतृत्वको अभ्यास सङ्घीय तहमा कति प्रभावकारी हुन्छ भन्ने प्रश्न खुलै छ ।

तर एक कुरा स्पष्ट छ—उनी राजनीति केवल पदका लागि होइन, प्रक्रियाका लागि पनि गर्नुपर्छ भन्ने विश्वास राख्ने नेताको सूचीमा पर्छन् । रुपन्देहीको राजनीतिमा उनको भूमिका अब केवल प्रतिनिधित्वमा सीमित छैन, नेतृत्वको चरित्र निर्माणमा पनि जोडिएको छ ।