खोज

काठमाडौँ ।

 बालबालिकाहरूले मोबाइल, कम्प्युटर र टेलिभिजन हेरेर बिताउने समय बढ्दा कम्मर दुख्ने समस्या पनि बढ्ने एक नयाँ अध्ययनले देखाएको छ । हेल्थकेयर जर्नलमा हिजो प्रकाशित अध्ययन प्रतिवेदनअनुसार स्क्रिनको अगाडि धेरै समय बिताउने बालबालिकामा ढाडको तल्लो भाग दुख्ने जोखिम उच्च हुन्छ ।

विश्वभरका ६ देखि १८ वर्ष उमेर समूहका झन्डै ५८ हजार बालबालिकाको तथ्याङ्क विश्लेषण गरेर गरिएको उक्त अध्ययनले स्क्रिन समयको हरेक थप घण्टाले कम्मर दुख्ने समस्याको सम्भावना २६ प्रतिशतले बढ्ने देखाएको छ ।

चिकित्सकहरूका अनुसार पछिल्ला वर्षहरूमा बालबालिकामा ढाडको तल्लो भाग दुख्ने समस्या बढ्दो क्रममा छ । गलत तरिकाले बस्ने बानी, लामो समयसम्म एउटै स्थितिमा बसिरहनु र शारीरिक गतिविधिको कमी यसका प्रमुख कारण हुन् ।

स्क्रिनको अगाडि बस्दा बालबालिकाहरू प्रायः झुकेर वा गलत आसनमा बस्ने भएकाले मेरुदण्ड र आसपासका मांसपेशीमा असामान्य दबाब पर्छ ।

प्रतिवेदनका अनुसार यस्तो दबाबले समयसँगै दुखाइ र अन्य स्वास्थ्य समस्या निम्त्याउन सक्छ । विश्व स्वास्थ्य सङ्गठनले बालबालिकाको स्क्रिन समय दैनिक २ घण्टाभन्दा कम राख्न सिफारिस गरेको छ । तर नेपालका धेरै बालबालिकाले यो सीमाभन्दा बढी समय स्क्रिनको अगाडि बिताउने गरेका छन् ।

स्वास्थ्य विशेषज्ञहरूले बालबालिकालाई नियमित शारीरिक गतिविधिमा संलग्न गराउन, सही बस्ने तरिका सिकाउन र स्क्रिन समय सीमित गर्न अभिभावकलाई सुझाव दिएका छन् ।