सामग्री खोज्नुहोस्

 काठमाडौं, १८ पुस ।

जेनजी (जनता–जनसंख्या) आन्दोलनबारे जाँचबुझ गर्न गठन गरिएको आयोगले म्याद बुझ्न अस्वीकार गरेका प्रमुख दलका दुई शीर्ष नेताहरू नेपाली कांग्रेसका सभापति शेरबहादुर देउवा र नेकपा संयोजक पुष्पकमल दाहाल ‘प्रचण्ड’ ले सार्वजनिक सूचना प्रकाशित हुने चेतावनीपछि म्याद बुझेको खुलेको छ ।

आयोगले आन्दोलनमा भएको दमन र भोलिपल्टको विध्वंसबारे दुवै नेतालाई आफ्नो धारणा राख्न आग्रह गर्दै पत्र पठाएको थियो । व्यक्तिगत सुरक्षा अधिकृत (पीएसओ)सँगको समन्वयमा पत्र बुझाउने प्रयास भए पनि दुवै नेताले सुरुमा पत्र बुझ्न अस्वीकार गरेका थिए ।

कांग्रेस सभापति देउवाले भनेका थिए कि उनी २४ भदौको आगजनीबाट पीडित भइसकेका छन् र घर जलेर नष्ट भएको कारण अन्यत्र बस्दै आएका छन् । साथै, जेनजी आन्दोलनको समयमा आफू राज्यको कुनै भूमिकामा नभएको भन्दै, त्यस्तो अवस्थामा बयान दिनुपर्ने आधार नहुने प्रश्न उठाएका थिए ।

त्यसैगरी प्रचण्डले पनि जेनजी आन्दोलनको समयमा आफू प्रमुख विपक्षी दलको नेताको भूमिकामा रहेको, त्यतिबेला सत्तामा रहेका व्यक्तिहरूलाई खबरदारी गरिरहेको तर आफ्नै घरमा आगजनी भएको अवस्थामा बयान दिनुपर्ने आधार के भएको हो भनी प्रश्न गरेका थिए ।

तर आयोगको समन्वयमा खटिएका कर्मचारी र सुरक्षा अधिकारीहरूले पत्र सोधपुछ र धारणा बुझ्नका लागि पठाइएको स्पष्ट पारेका थिए । आयोगले सहयोग गर्न अस्वीकार गरे सार्वजनिक सूचना जारी हुने र सहयोग नगरेको विवरण प्रतिवेदनमा समावेश हुने चेतावनी दिएको थियो ।

प्रहरीसम्बद्ध स्रोतका अनुसार, ‘त्यसपछि दुवै नेताले केही घण्टाको फरकमा पत्र बुझ्नुभएको छ, तर आयोगमा जाने वा लिखित जवाफ दिने विषयमा अझै केही तय भएको छैन ।’