खोज

भैरहवा, २० कार्तिक  ।

प्रत्येक वर्ष कार्तिक शुक्ल पूर्णिमाको पावन अवसरमा रुपन्देहीको ओमसतिया गाउँपालिका वडा नम्बर ५ मा लाग्ने सतियामाई मेला यस वर्ष पनि लाखौँ श्रद्धालु भक्तजनहरूले भरेका छन् ।

यो प्राचीन र ऐतिहासिक मेलामा रुपन्देही जिल्लाका मात्र नभई छिमेकी जिल्लाहरू नवलपरासी, कपिलवस्तु तथा भारतबाट समेत ठुलो सङ्ख्यामा दर्शनार्थीहरू मेला भर्न आएका थिए ।

मेला भर्न आउने भक्तजनहरूले नजिकै बग्ने रोहिणी खोलामा पवित्र स्नान गरी सतिया माईको दर्शन गर्ने परम्परा रहेको छ ।

रोहिणी खोलामा स्नान गरेपछि सतिया माईसँग मागेको मनोकामना पूर्ण हुने धार्मिक विश्वासका कारण यो मेलामा प्रत्येक वर्ष लाखौँ दर्शनार्थीहरूको घुइँचो लाग्ने गरेको हो । यस वर्ष पनि सोही आस्था र विश्वासका साथ भक्तजनहरूले माईको पूजा अर्चना र दर्शन गरेका छन् ।

यो मेलाले धार्मिक सद्भाव र सामाजिक एकताको अनुपम उदाहरण प्रस्तुत गरेको छ । नेपालका विभिन्न जिल्लाका साथै सीमावर्ती भारतीय क्षेत्रका श्रद्धालुहरू पनि यस मेलामा सहभागी हुन आउने गरेकाले यसको महत्त्व र आकर्षण निकै ठुलो छ ।

ओमसतिया गाउँपालिका वडा नम्बर ५ का वडा अध्यक्ष मदन प्रसाद पोखरेलले मेला हजारौँ वर्ष पुरानो रहेको बताए । उनले मेला नजिकै रहेको एक जना थारु थरकी महिला उनको पतिको निधनपछि सती जान खोजेको र स्थानीयहरूले नदिए पछि अहिले मन्दिर रहेको स्थानमा आएर बसेकी थिइन ।

पछि गाउँलेहरूले त्यही झुपडी बनाई दिए । मेलाको समयमा हुने भण्डारामा चिनी, तेल लगायतका खाद्यान्नको कमी हुँदा रोहिणी खोलाबाट उधारोमा बालुवा र पानी ल्याए त्यो आफै खाद्यान्नमा परिणत हुने गरेको किंवदन्ती रहेको पोखरेलको भनाई छ । उनले ऐतिहासिक मेलालाई प्रत्येक वर्ष स्थानीयहरूले नै संरक्षण गरी मनाउँदै आएको बताए ।

मेलामा ५ दिन लाग्ने गर्छ । भजन किर्तन, रामलीला सहित सतियामाताको पूजा र अन्तिम दिन कुस्ती प्रतियोगिता गरी मेलाको समापन हुने गरेको छ । यस पटक मेलामा मात्र २ लाख बढी श्रद्धालुहरूको आगमन रहेको अनुमान गरिएको वडा अध्यक्ष मदन प्रसाद पोखरलले बताए ।

बुधबार मेलामा कुनै अप्रिय घटना हुन नदिन सबै तयारीहरू गरिएको मेला व्यवस्थापन समितिका अध्यक्ष देवानन्द चौधरीले बताए । उनले बिहीबार कुस्ती प्रतियोगितासँगै मेलाको समापन हुने बताए । कुस्तीमा नेपालसँगै भारतीय प्रसिद्ध पहलवानहरूको पनि सहभागिता रहने उनले बताए ।