खोज

काठमाडौँ ।

सरकारले नेकपा एमाले निकट युवा संघ नेपाललाई शनिबार काठमाडौँमा आयोजना गर्न लागिएको मोटरसाइकल र्‍याली तथा सभाको अनुमति नदिने निर्णय गरेको छ ।

काठमाडौँ जिल्ला प्रशासन कार्यालयले शुक्रबार सूचना जारी गर्दै शान्ति–सुरक्षा कायम राख्न र सार्वजनिक सम्पत्तिको सुरक्षा सुनिश्चित गर्न उक्त कार्यक्रमको अनुमति नदिइएको जनाएको हो ।

‘गत भाद्र २३ गतेको “जेनजी आन्दोलन” पछिका दिनहरूमा तोडफोड, आगजनी तथा सार्वजनिक र निजी सम्पत्तिमा क्षति पुर्‍याउने घटनाहरू भएका सबैलाई विदितै छ,’ सूचनामा उल्लेख गरिएको छ । ‘शान्ति–सुरक्षाको अवस्था कायम राख्न, सार्वजनिक सम्पत्तिको संरक्षण गर्दै सेवा प्रवाहलाई सुचारु गर्न आवश्यक पहलहरू थालिएका छन् ।

यसै क्रममा विभिन्न समूहहरूले आयोजना गर्न खोजेका र्‍याली, जुलुश, धर्ना, सभा तथा प्रदर्शनजस्ता कार्यक्रमहरूले सुरक्षा चुनौती निम्त्याउन सक्ने देखिएको हुँदा यस कार्यालयबाट त्यस प्रकारका कुनै पनि कार्यक्रमको अनुमति प्रदान नगर्ने निर्णय गरिएको छ ।’

प्रशासन कार्यालयले कुनै पनि पूर्वस्वीकृतिविना सार्वजनिक कार्यक्रम नगर्न पनि सबैलाई आग्रह गरेको छ । युवा संघ नेपालले शनिबार दिउँसो १ बजे काठमाडौँका विभिन्न स्थानबाट मोटरसाइकल र्‍याली निकाल्ने तयारी गरेको थियो ।