खोज

बुटवल, २९ मंसिर ।

कालिका मानवज्ञान माध्यामिक विद्यालयमा हुने जिल्लास्तरिय कालिका रनिङ शिल्ड प्रतियोगिताको तयारी पूरा भएको छ । विद्यालयको ६२ औ वार्षिकोत्सव तथा अभिभावक दिवसको अवसरमा पुस १ देखि ७ गतेसम्म मनाउने सप्ताहव्यापी कार्यक्रम अन्तर्गत दोस्रो संस्करणको रनिङ शिल्ड प्रतियोगिताको सम्पूर्ण तयारी पूरा भएको विद्यालयका प्रधानाध्यापक दिनेश थापाले बताए ।

वि.सं. २०४६ सालमा नगरस्तरीय रनिङशिल्ड खेलाईएको इतिहास विद्यालयको रहेको उनले बताए । केही समय रोकिएको प्रतियोगिता जिल्लास्तरीय रुपमा वि.सं. २०७८ बाट खेलाउन थालिएको हो ।

एथलेटिक्सतर्फ एक सय, दुई सय, चार सय, आठ सय, एक हजार पाँच सय मिटर दौड, लङजम्प, त्रिपलजम्प, सटपुट, ४ बाई १ सय रिले, ४ बाई ४ सय रिले प्रतियोगिता हुनेछ । यसैगरी छात्रछात्रा भलिबल प्रतियोगिता हुनेछ जसमा छात्रतर्फ ३८ र छात्रातर्फ २२ टिम भाग लिनेछन् ।

यसैगरी कबड्डीतर्फ छात्रमा २८ र छात्रातर्फ २० टिमले भाग लिएको खेल संयोजक हरिश ओलीले बताए । उद्घाटन सत्रमा विद्यार्थीहरुबाट मार्च पास तथा पिटि प्रदर्शन कार्यक्रम गरिने उनले बताए । प्रतियोगितामा २४ स्वर्ण, २४ रजत र २४ कास्य पदक गरि ७२ पदकमा खेलाडीहरुले प्रतिस्पर्धा हुनेछ ।

प्रतियोगिताको प्रथम, द्घितिय र तृतीय टिमलाई नगद ५० हजार, ३० हजार र २० हजार रुपैया, शिल्ड, मेडल, प्रमाणपत्रबाट पुरस्कृत गरिने उनले बताए। प्रतियोगितामा निजि तथा सामुदायिक ५० वटा विद्यालयहरुले भाग लिने छन् ।

राखेपका सदस्यसचिव टंकलाल घिसिङबाट उद्घाटन हुने कार्यक्रममा भलिबल प्रतियोगिता हुनेछ । विद्यालयमा ८ हजार २ सय विद्यार्थीहरु अध्ययनरत छन् ।