खोज

काठमान्डौ, १४ असोज ।

वैदेशिक रोजगार विभागले दशैं बिदामा समेत श्रम स्वीकृति जारी गर्ने भएको छ । यसका लागि डेडिकेटेड कर्मचारी परिचालन गरिएको विभागका महानिर्देशक कमल भट्टराईले जानकारी दिएका छन् ।

उनका अनुसार दशैं बिदामा श्रम स्वीकृति दिन एक जना उपसचिवसहित सात जना कर्मचारी तोकिएका छन् ।

विशेषगरी वैदेशिक रोजगारीका लागि भिसा प्राप्त गरी हवाई टिकट समेत काटिसकेकाहरूलाई बिदाका दिनमा श्रम स्वीकृति आवश्यक पर्न सक्ने हुँदा यस्तो व्यवस्था मिलाइएको विभागले जनाएको छ ।

श्रम स्वीकृतिका लागि अनलाइनमार्फत आवेदन दिनुपर्ने व्यवस्था छ । आवश्यक कागजातसहित पेश गरिएको आवेदनको आधारमा स्वीकृति दिइनेछ । तर, आवश्यक कागजात नपुगेको खण्डमा आवेदन अस्वीकृत हुने र अस्वीकृतिको कारणसमेत स्पष्ट पारिने विभागले जनाएको छ ।

यसैबीच, वैदेशिक रोजगारका प्रमुख गन्तव्य मुलुकहरूले भिसामा कडाइ गरेका छन् । संयुक्त अरब इमिरेट्सले भिजिट भिसामा रोक लगाउनुका साथै वर्किङ भिसामा पनि कठोरता बढाएको छ । त्यस्तै, मलेसिया लगायतका अन्य मुलुकहरूले पनि वर्किङ भिसा प्रक्रियामा कडाइ गरिरहेका छन् ।

गत भदौ २३ र २४ गते भएको जेन–जी आन्दोलनपछि नेपालका कारागारबाट कैदीबन्दी फरार भएको घटनालाई आधार बनाएर ती मुलुकहरूले कडाइ गरेको बताइएको छ ।