भैरहवा, ३० भदौ ।
रुपन्देही सहित लुम्बिनी प्रदेशका सबै जिल्लाहरूको जनजीवन सामान्य बन्दै गएको छ । शैक्षिक तथा व्यावसायिक क्षेत्रमा कामहरू सुचारु भएका छन् । आन्दोलनमा क्षति भएकाहरूको पनि विवरण निकाल्न सुरु गरिएको छ ।
निजी तथा सरकारी सबै विद्यालयहरूले नियमित रूपमा विद्यालय सञ्चालन गरेका छन् । सवारीका साधनहरू निर्बाध रूपमा चल्न थालेपछि जनजीवन सामान्य बन्दै गएको हो ।
विभिन्न स्थानमा जेनजीका नाममा गरेका गलत कामको विरोध सुरु भएका छन् । विभिन्न व्यक्तिहरूका निजी सम्पत्ति माथि आगो लगाउने र सामानहरू चोरी गर्नेहरूलाई खबरदारी गरिएको छ ।
यसै गरी विभिन्न सार्वजनिक संस्थाहरूले पनि सरसफाइ र पुन निर्माणको कामलाई सुरु गर्न थालेका छन् भने कहीँ कतै जनताका कामहरू गर्न पनि सुरु गरिएको छ ।
जेनजी आन्दोलनको क्रममा जलेर नष्ट भएका भैरहवाका सरकारी कार्यालयहरूले पुनर्निर्माणको सट्टा अस्थायी व्यवस्थापनबाटै सेवा सुरु गरेका छन् । जलेको भवनको खण्डहरमाथि आशाको पाल टाँगेर भैरहवा भन्सार कार्यालयले सम्पूर्ण सेवाहरू आइतबारबाट सुचारु गरेको छ भने आन्तरिक राजस्व कार्यालयले पार्किङ यार्डबाटै काम थालेको छ ।
भन्सार कार्यालयको सेवा र राजस्व सङ्कलन
भैरहवा भन्सार कार्यालयका प्रमुख भन्सार अधिकारी शिवलाल न्यौपानेका अनुसार, कार्यालयमा २५ गते मात्रै काम गर्न नसकिएको र २६ गतेदेखि ग्यास, डिजेल, पेट्रोल र औषधिलगायतका अत्यावश्यक वस्तुहरूको जाँच पास सुरु गरिएको थियो ।
उनले २६ गते ४ वटा ग्याँस बुलेट र २७ गते तरकारी तथा फलफूल बोकेका २१ वटा गाडी छोडिएको जानकारी दिए । २८ गते शनिबार २३९ वटा गाडीको जाँच पास गरी ४ करोड ५ लाख राजस्व सङ्कलन गरिएको न्यौपानेले बताए ।
कार्यालयको भुक्तानी र प्रज्ञापन पत्र भर्ने प्रणाली अनलाइनमा भएकाले कर्मचारीहरूले व्यक्तिगत ल्यापटप र जल्नबाट जोगिएका ल्यापटपको प्रयोग गरी अस्थायी रूपमा काम गरिरहेका छन् । कर्मचारी बस्ने क्वाटरबाट बिजुलीको तार तानिएको छ ।
“हाम्रो भुक्तानी र प्रज्ञापन पत्र भर्ने प्रणाली अनलाइन प्रणालीमा छ, त्यसैको आधारमा अस्थायी रूपमा कार्यालय खडा गरेर सबै कर्मचारीहरूको व्यक्तिगत ल्यापटप, जल्नबाट जोगिएका ल्यापटपबाट काम गरिरहेका छौँ ।” न्यौपानेले भने “यसको लागि छुट्टै बिजुलीको तार तानेर काम गरिरहेका छौँ र बैङ्कले पनि आजैदेखि सेवा सुचारु गर्ने गरि लागेको जानकारी पाएका छौँ ।”
पूर्ण रूपमा जलेको यात्रु शाखाबाट हुने अस्थायी जाँच पास पैठारीको काम पनि सुरु भएको छ, तर लोकल सर्भर जलेका कारण भारतीय नम्बर प्लेटका गाडीलाई दिइने सुविधा सेवा भने हाललाई रोकिएको छ । यो सेवा सकेसम्म सोमबारदेखि सञ्चालनमा ल्याउने प्रयास भइरहेको छ ।
आन्तरिक राजस्व कार्यालयको पहल
आन्तरिक राजस्व कार्यालयका प्रमुख कर अधिकृत प्रेमराज पोखरेलले आइतबारदेखि नै कार्यालय सरसफाइ गरी सेवाग्राहीलाई सेवा दिन थालिएको जानकारी दिए ।
कार्यालयका सबै तथ्याङ्क र सूचनाहरू डिजिटल भएकाले सुरक्षित छन् र भौतिक रूपमा रहेका केही फाइलमा क्षति पुगे पनि त्यसले खासै असर नपर्ने उनले बताए ।
कर्मचारीका उपलब्ध ल्यापटप र पार्किङ ¥याडमै इन्टरनेट तथा बिजुली जडान गरी काम सुरु गरिएको छ । पोखरेलले सीमित स्रोतबाटै भए पनि सेवाग्राहीलाई सेवा दिन आफूहरू प्रतिबद्ध रहेको बताए ।
जिल्ला प्रशासनको समन्वय
रुपन्देहीका प्रमुख जिल्ला अधिकारी डा. टोकराज पाण्डेले आइतबारदेखि जिल्लाका सबै सरकारी कार्यालयहरूको सेवा सुचारु गरिएको जानकारी दिए ।
उनले जलेका सरकारी कार्यालयहरूमा कम्पाउन्डमै टेबल कुर्सी राखेर सेवाग्राहीलाई सेवा तथा जानकारी दिने व्यवस्था गरिएको बताए । निजी क्षेत्रमा भएको क्षतिको पूर्ण विवरण आउन भने केही समय लाग्ने उनको भनाइ छ ।
जलेर ध्वस्त भएका यी कार्यालयहरूले आफ्नो खण्डहरबाटै सेवाको ज्योति बाल्न सुरु गरेका छन्, जसले सेवाग्राहीहरूमा भविष्यमा पूर्ण रूपमा पुनर्स्थापित हुने विश्वास र आशा जगाएको छ । यो केवल सरकारी सेवाको पुनरागमन मात्र नभएर, विपत्तिपछि फेरि उठ्ने र जीवनलाई सामान्य बनाउने मानवीय भावनाको जित पनि भएको सरोकारवालाहरूको भनाइ छ ।
५ पुष २०८२, शनिबार
