खोज

तिलोत्तमा, ३१ साउन ।

तीज पर्वको सांस्कृतिक उल्लासलाई योग र स्वास्थ्यसँग जोड्दै विष्णुपुर योग साधना केन्द्रले शनिबार तीज मिलन कार्यक्रम सम्पन्न गरेको छ । विश्व शान्ति तथा आध्यात्मिक विज्ञान समाजको समन्वयमा आयोजित उक्त कार्यक्रममा महिलाहरूले तीज गीतका माध्यमबाट योग सम्बन्धी सन्देश प्रवाह गरेका थिए ।

कार्यक्रमको उद्घाटन तिलोत्तमा नगरपालिकाका नगर प्रमुख रामकृष्ण खाणले गरेका थिए । उनले योग अभ्यासलाई दैनन्दिन जीवनमा समावेश गर्न सके शारीरिक तथा मानसिक स्वास्थ्यमा आमूल परिवर्तन ल्याउन सकिने धारणा व्यक्त गरे । नगरप्रमुख खाणले योग संस्कृतिलाई समाजमा विस्तार गर्न यस्ता कार्यक्रमहरूले महत्वपूर्ण योगदान पुर्याउने विश्वास व्यक्त गरे ।

 सो अवसरमा विश्व शान्ति तथा आध्यात्मिक विज्ञान समाजका केन्द्रीय सदस्य अर्जुन ज्ञवालीले योगले मानिसलाई आत्मिक शान्ति दिलाउने र सकारात्मक जीवनशैलीतर्फ अघि बढाउने बताए । तिलोत्तमा–४ का वडाध्यक्ष हरिबहादुर क्षेत्रीले समुदायस्तरमै स्वास्थ्य सचेतना फैलाउने अभियानमा तीज मिलनजस्ता कार्यक्रम उपयोगी हुने उल्लेख गरे । त्यस्तै, विष्णुपुर टोल विकास संस्थाका अध्यक्ष विष्णु भण्डारीले योगलाई समाजमा व्यवहारिक अभ्यासको रूपमा स्थापित गर्न निरन्तर कार्यक्रम आवश्यक रहेको धारणा राखे ।

कार्यक्रममा सहभागी महिलाहरूले प्रस्तुत गरेका तीज गीतले मनोरञ्जन मात्र नभई योगाभ्यासको महत्वबारे गहिरो सन्देश पनि दिएको थियो । सहभागी सविता पौडेलले आफ्नो अनुभव सुनाउँदै भनिन्, “तीज मिलनले हामी महिलालाई संस्कृतिसँगै योग अभ्यासतर्फ प्रेरित गरेको छ । स्वास्थ्यप्रति सचेतना बढाउने यसरी रमाइलो ढंगले प्रस्तुत भएको कार्यक्रम निकै उपयोगी लाग्यो ।”

आयोजक संस्थाका अनुसार आगामी दिनमा पनि योगलाई समुदायमा प्रचार–प्रसार गर्ने, स्वास्थ्य चेतना अभिवृद्धि गर्ने र विशेषतः महिलालाई योगाभ्यासमा सहभागी गराउने उद्देश्यले निरन्तर कार्यक्रम सञ्चालन गरिनेछ ।