खोज

भैरहवा, १९ मंसिर ।

स्वर्गीय शेरबहादुर सेन्चुरी मेमोरियल अन्तरविद्यालय स्तरीय टी–२० क्रिकेट प्रतियोगिता अन्तर्गत सोमबारको खेलमा होराइजन जीविएस स्कूल, बुटवल र जेसिज हाई स्कूल, भैरहवा विजयी भएका छन् । होराइजनले बुद्धज्योति स्कूल भैरहवालाई १ सय १० रन र जेसिजले सनसाइन इङ्गलिस बोर्डिङ स्कूल, भैरहवालाई १ रनले पराजित गर्दै जित निकालेको छ ।

पहिलो खेलमा टस जितेर ब्याटिङ गरेको होराइजनले निर्धारित २० ओभरमा सुदन कँडेल र शुभम खनालको अर्धशतकीय पारीमा ५ विकेटको क्षतिमा २ सय २ रनको विशाल योगफल बनायो । कँडेलले ५९ रन जोड्दा खनालले ५१ रन बनाए । यस्तै, समिप गौतमले १५ रन बनाए । बलिङमा बुद्धज्योतिका आयुष झाले २ तथा सुभम यादव र रोहन हरिजनले समान १–१ विकेट लिए ।

जवाफमा बुद्धज्योति ९ विकेटको क्षतिमा ९२ रनमै समेटियो । उसका लागि रोहन हरिजनले २१, मनोज यादवले ११ र सुदिप चौधरीले १० रन बनाए पनि अन्य ब्याट्सम्यानले दोहोरो अंक जोड्न सकेनन् । बुद्धज्योतिलाई सस्तैमा रोक्न बलिङमा होराइजनका शशांक ज्ञवाली, विप्लव केसी र कुशल पौडेलले समान २–२ विकेट लिए । होराइजनका सुभम खनाल म्यान अफ द म्याच घोषित भए । उनी पाँच सय रुपैयाँबाट पुरस्कृत भए ।

दोस्रो खेलमा टस जितेर ब्याटिङ गरेको जेसिजले निर्धारित खेलमा पूरै विकेट गुमाउँदै ९७ रनको योगफल बनायो । उसका लागि निश्चल भुसालले ३३ र सागर कुँवरले १० रनको योगदान दिए । बलिङमा शनसाइनका हविबुल्लाह अन्सारीले ३ तथा गणेश धवल, प्रदीप पासी र वृजेश यादवले समान १–१ विकेट लिए ।

जवाफमा शनसाइनले पूरै विकेट गुमाउँदै ९६ रन मात्रै बनायो । उसका लागि सनुप सेनले २१ र वृजेश यादवले १९ रन जोडे पनि अन्य ब्याट्सम्यान नचल्दा सामान्य लक्ष्य पनि भेटाउन सकेन । बलिङमा जेसिजका निश्चल भुसालले ३ तथा निशान्त बश्याल र संगम पाण्डेले समान २–२ विकेट लिए । खेलमा जेसिजका निश्चल भुसाल म्यान अफ द म्याच भए र ५ सय रुपैयाँ प्राप्त गरेको आयोजक संस्था रुपन्देही क्रिकेट संघका अध्यक्ष हरिबहादुर थापाले बताए ।

प्रतियोगिताको बिजेता टिमले नगद ३० र उपविजेताले १५ हजार रुपैयाँ र ट्रफी प्राप्त गर्नेछन् । यस्तै, म्यान अफ द सिरिजलाई ५ हजार, उत्कृष्ट बलर र ब्याट्सम्यानलाई दुई हजार ५ सय, प्रत्येक खेलको म्यान अफ द म्याचलाई ५ सय रुपैयाँ प्रदान गरिने छ । प्रतियोगिताको अन्तिममा अनुशासित खेल प्रदर्शन गर्ने एक टिमलाई पनि पुरस्कृत गरिने छ । निजी र संस्थागत गरी १३ विद्यालय सहभागी प्रतियोगिता मंसिर २४ गतेसम्म संचालन हुनेछ । प्रतियोगिताको मुख्य प्रायोजकमा पर्वत ज्वेलर्स भैरहवा छ ।

एभरेष्ट प्रतियोगिताबाट निस्कासित

यसैबीच स्व.शेरबहादुर सेन्चुरी मेमोरियल अन्तरविद्यालय स्तरीय टी–२० क्रिकेट प्रतियोगिताबाट एभरेष्ट बोर्डिङ स्कूल बुटवललाई निस्कासित गरिएको छ । आइतबारको उद्घाटन खेलमा एभरेष्टले साईग्लोबल एकेडेमी भैरहवालाई ९ विकेटले पराजित गरेको थियो । तर, खेलमा स्कूलभन्दा बाहिरका खेलाडी खेलाएको क्रिकेट संघमा निवेदन परेको थियो । निवेदनका आधारमा छानविन गर्दा बाहिरका खेलाडी खेलाएको प्रमाणित भएपछि एभरेष्टलाई प्रतियोगिताबाटै निस्कासित गरिएको रुपन्देही क्रिकेट संघका सचिव संजय गुरुङले जानकारी दिए ।