खोज

अर्घाखाँची, ०८  साउन । 
जिल्लामा आफ्नो घर र आफ्नै परिवारजनबिच असमझदारी बढ्दै जाँदा परिवार भित्रबाटै ज्यान लिने सङ्ख्या बढ्दै गएको छ । घरायसी झैझगडा हुँदा आफन्तबाटै मारिने गरेको जिल्लामा घटेका घट्नाबाट यो तथ्य खुलेको हो ।

घरेलु विवाद, अनैतिक यौन सम्बन्ध, शङ्का उपशङ्का नै यसको प्रमुख कारक रहेको पाइन्छ । गएको एक महिनाभित्र अर्घाखाँचीमा तिन जनाको हत्या भएको छ सबै हत्या परिवारजनबाट भएको जिल्ला प्रहरी कार्यालय अर्घाखाँचीले जनाएको छ ।

पहिलो घटना:
२०७९ कार्तिक ४ गते वृद्ध भत्ता बुझेर आएका सहोदर दाजुले भाइलाई भिरबाट धकेलेर हत्या गरे । २०७९ कार्तिक ४ गतेका दिन भुमिकास्थान नगरपालिका १ खलाधारा भीरमा धकेलेर सोही ठाउँको साम्नेगाँउका ७० वर्षका वीर बहादुर गमालको मृत्यु भएको हो ।

वीर बहादुरलाई उनकै सहोदर दाजु बर्ष ७४ को हिम बहादुर गमालले कार्तिक २ गते बेलुकी अन्दाजी ७ बजे बाटोमा हिँड्दै गर्दा लेनदेनको विवादपछि भीरबाट धकेलेका थिए ।

उनीहरू वडा नं. ४ धापानीस्थित एक बैङ्कबाट वृद्ध भत्ता बुझेर फर्कँदै गर्दा दाजु भाइको लेनदेनको विषयमा विवाद गरेका कारण घटना भएको अनुसन्धानको क्रममा पत्ता लागेको हो ।

दोस्रो घटना:
२०८१ कार्तिक २८ गते शितगंगामा मामाले भान्जाको हत्या गरे । शितगंगा–६, सानाढुंग्रेमा भएको घटनामा ३५ वर्षीय तिलक रेश्मी भिरमा मृत फेला परेका थिए ।

रेश्मीको हत्या गरेको अभियोगमा सहोदर मामा शितगंगा नगरपालिका ६ सानाढुंग्रेका ५३ वर्षीय झन्द्रबहादुर गाहा पक्राउ परे । दुवै जनाले मादक पदार्थ सेवन गरेको र विवादपछि झगडाले उग्र रूप लिँदा राति घटना घटेको प्रहरीको अनुसन्धानबाट खुलेको थियो ।

तेस्रो घटना:
२०८२ असार १ गते छत्रदेव गाउँपालिकामा आफ्नै श्रीमतीले श्रीमानको ज्यान लिईन् । छत्रदेव गाउँपालिका वडा नम्बर–३, दुन्द्रुक शिख्रे बस्ने २७ वर्षीय मेखमायाँ कुमालले आफ्नै ३८ वर्षीय श्रीमान् रामु कुमालको धारिलो हतियार (दाउ) प्रहार गरी हत्या गरिन् ।

घरायसी विवाद हुँदा सामान्य झैझगडा गरेर सँगै सुतेका श्रीमानलाई रिसको झोँकमा राती साढे १२ बजे उठेर दाउ टाउकोमा हिर्काइन् र हत्या गरिन् । झगडाको प्रमुख कारण महिलाको परपुरुषसँगको सम्बन्ध रहेको गाउँलेले बताउँछन् ।

चौथौँ घटना:
२०८२ असार १२ गते शितगंगा नगरपालिकामा सहोदर दाइले भाइको हत्या गरे । शितगंगा नगरपालिका वडा नम्बर–६, जुकेना पाखापानीका ४२ वर्षीय टेक बहादुर बादीले आफ्नै सहोदर भाइ ३२ वर्षीय बोम बहादुर बादीको बन्चरो प्रहार गरी हत्या गरे ।

सँगै बसेर मदिरा सेवन गरिरहेका दाजुभाइबिच चुरोटलाई लिएर विवाद सुरु भयो । झैझगडा लम्बिँदा विवादले उग्र रूप लियो जसले दाइले भाइको टाउकोमा बन्चरो प्रहार गर्न पुगे । यो केसमा समेत देवर–भाउजूको अनैतिक सम्बन्ध प्रमुख कारक रहेको बताइन्छ ।

पाचौं घटना:
२०८२ असार २६ गते सन्धिखर्क नगरपालिकामा झड्केला छोराले बुवाको हत्या गरेर मलखादमा पुरे । सन्धिखर्क नगरपालिका वडा नम्बर–१२, डिभर्ना बाँझखर्कमा ७२ वर्षीय जंगबहादुर नेपालीलाई झड्केलो छोरा बुद्धि बहादुर नेपालीले धारिलो हथियार प्रयोग गरी निर्मम हत्या गरेका थिए ।

हत्यापछि घटना लुकाउन बुवाको शवलाई मलखादमा गाडे । मदिरा सेवन गरेर घरमा पुगेका नेपालीले बुवासँग झगडा गरेका थिए । झगडाले उग्र रूप लिएपछि उनले बुवामाथि कुटपिट गर्दा मृत्यु भएको थियो ।

यो घटनामा आपसी मेल नहुनु कारण देखिएको छ यद्यपि घटनाको अनुसन्धान भइरहेको छ । यी ताजा र प्रतिनिधि घटना हुन् । अर्घाखाँचीमा पछिल्लो तीन वर्षमा भएका दर्जन हत्याहरूमध्ये अधिकांश परिवार र आफन्तबाट नै भएको देखिएका छन् ।

मानिसले आफूलाई सबैभन्दा सुरक्षित ठान्ने परिवार, आफन्त र निकटस्थ जन हुन् । तर विभिन्न बहानामा सुरु हुने असमझदारी आवेशमा भौतिक आक्रमणसम्म पुग्दा जघन्य अपराधमा रूपान्तरण हुने गरेको प्रहरीले बताएको छ ।

आपसमा बेमेलको वातावरण सृजना हुँदा घरभित्रै अपराधका घटना हुने गरेको जिल्ला प्रहरी कार्यालयका प्रमुख (डिएसपी) चक्र बहादुर मल्लले बताए ।