खोज

बुटवल, २२ असार । क्यानडामा नेपाली समुदायको उन्नयन, सहकार्य र सेवामा खरो भूमिका निभाउँदै आएकी चन्द्रा अधिकारी आज नेपाली डायस्पोरामा महिला नेतृत्वको सशक्त उदाहरणका रूपमा उभिएकी छन् । स्याङ्जा जिल्ला, चापाकोट–८, शाखरमा जन्मिएकी चन्द्रा अधिकारी हाल एनआरएनए क्यानाडाको महासचिवको रूपमा जिम्मेवारी सम्हालिरहेकी छन् । अब उनले आगामी २० जुलाई २०२५ मा हुने एनआरएनए क्यानडा निर्वाचनमा अध्यक्ष पदमा उम्मेदवारी घोषणा गरेकी छन् ।

चन्द्रा अधिकारी सन् २०१८ मा स्नातकोत्तर अध्ययनपछि क्यानडा प्रवेश गरेकी थिइन् । नेपालमा सामाजिक कार्यमा गहिरो रुचि राख्ने चन्द्रा २०१५ को गोरखा केन्द्रविन्दु भूकम्पपछि देशका विभिन्न प्रभावित जिल्लामा राहत, पुनर्निर्माण र श्रमदानमा अग्रसर भइन् । क्यानाडा पुगेपछि कोभिड–१९ महामारीको कठिन समयमै उनले नेपाली विद्यार्थी, आप्रवासी र असहायहरूका लागि खाना, औषधि र आवश्यक सामग्री लिएर अग्रमोर्चामा काम गरिन् । स्थानीय क्यानाडेली समाजमा अवरोध हुँदा पनि उनले हार मानिनन् ।

विगत पाँच वर्षमा उनले क्यानाडामा रहेका नेपाली विद्यार्थीहरूको स्वास्थ्य, बसोबास, मानसिक अवस्था र कानुनी अवस्थाका विषयमा समाधान खोजी गर्ने प्रमुख भूमिकामा आफूलाई प्रस्तुत गरिन् । एनआरएनए क्यानाडाको महासचिवमा अत्यधिक मतसहित विजयी भएपछि उनको नेतृत्व झनै मजबुत बनेको देखिन्छ । कानुनी समस्यामा परेका नेपालीहरूलाई नेपाल फर्काउने, मृत्यु भएका विद्यार्थीहरूका शव व्यवस्थापन, र मानसिक समस्या समाधानमा उनले देखाएको तत्परता उल्लेखनीय छ ।

अध्यक्ष पदको उम्मेदवारी : योजनासहितको नेतृत्व
अध्यक्ष पदका लागि उम्मेदवारी घोषणा गर्दै उनले भनिन् । “म सामुदायिक केन्द्र स्थापनादेखि नेपालमा लगानी भित्र्याउने, नेपाल–क्यानाडा व्यापार विस्तार गर्ने, र सरकारले बेवास्ता गरेका नेपालीहरूका लागि आवाज बुलन्द गर्ने योजना लिएर आएको छु ।” चन्द्राले सरकार र नेपाली समुदायबीच सेतुको भूमिका निर्वाह गर्ने प्रतिबद्धता जाहेर गरेकी छन् ।

उनी क्यानाडा सरकारबाट दुईवटा उच्च सम्मान प्राप्त गरिसकेकी छिन । उनको कार्यक्षमता र सेवाको कदर दर्शाउँछ । वैवाहिक जीवनमा श्रीमान् र दुई सन्तानसहित सन्तुलन कायम गर्दै, उनले सेवामा नाफाभन्दा मूल्यलाई अघि सारेकी छन् । घरेलु हिंसा, लैंगिक विभेद, मानसिक समस्या, आपसी कलह लगायतका विषयमा पनि उनी लगातार क्रियाशील छिन् । नेतृत्वका लागि पुरुष हुनुपर्छ भन्ने धारणा तोड्दै, चन्द्रा अधिकारीले आफ्ना कामबाट प्रमाणित गरिसकेकी छन् कि नेतृत्व क्षमता लिङ्ग होइन, सोच, समर्पण र दृष्टिकोणमा निर्भर गर्छ ।

क्यानाडामा बसोबास गर्ने नेपाली समुदायका लागि चन्द्रा अधिकारी केवल एक उम्मेदवार होइनन्—उनी आशा, आत्मविश्वास र समर्पणको प्रतीक हुन् । एनआरएनए क्यानाडाको अध्यक्ष पदका लागि उनको उम्मेदवारी नेपाली डायस्पोरामा महिला नेतृत्वको स्वीकारोक्ति बन्ने अपेक्षा गरिएको छ ।