सामग्री खोज्नुहोस्

लिवाङ । नेपालीहरूको महान् चाड बडादशैं तथा तिहार नजिकिँदै गर्दा शान्ति सुरक्षा कायम राख्न, सामाजिक विकृति न्यूनीकरण गर्न र सम्भावित दुर्घटना रोकथाम गर्न रोल्पामा घरेलु मदिराको बिक्री वितरणविरुद्ध अनुगमन तीव्र पारिएको छ । जिल्ला प्रशासन कार्यालय रोल्पा, जिल्ला प्रहरी कार्यालय रोल्पा, स्थानीय सरकार तथा विभिन्न सरकारी र गैरसरकारी संघसंस्थाको समन्वयमा जिल्लाका विभिन्न बजार तथा होटलमा अनुगमन गरिएको हो ।

चाडपर्वको समयमा मादक पदार्थ सेवन गरी होहल्ला गर्ने, समाजमा अशान्ति फैलाउने, जुवातास खेल्ने तथा मादक पदार्थ सेवन गरेर सवारीसाधन चलाउनेजस्ता गतिविधि बढ्न सक्ने भएकाले यस्ता गतिविधि नियन्त्रण गर्न अनुगमनलाई तीव्र बनाइएको सम्बन्धित निकायले जनाएका छन् । अनुगमनका क्रममा विभिन्न होटल तथा पसलमा बिक्री वितरणका लागि राखिएको घरेलु मदिरा जफत गरी नष्ट गरिएको छ ।

जिल्ला प्रहरी कार्यालय रोल्पाका कार्यालय प्रमुख प्रहरी नायब उपरीक्षक पञ्चकुमार बाखुले दिएको जानकारीअनुसार रोल्पा नगरपालिका वडा नम्बर २ र ४ मा रहेका विभिन्न होटलमा अनुगमन गर्दा बिक्री वितरणका लागि राखिएको १८९ लिटर घरेलु मदिरा जफत गरी नष्ट गरिएको छ । त्यस्तै, रुन्टीगढी गाउँपालिकाको होलेरी बजारमा रहेका होटल तथा विभिन्न पसलमा गरिएको अनुगमनका क्रममा थप ६० लिटर घरेलु मदिरा जफत गरी नष्ट गरिएको उनले बताएका छन् । दुवै स्थानमा गरिएको अनुगमनबाट कुल २४९ लिटर घरेलु मदिरा जफत गरी नष्ट गरिएको हो । चाडपर्वलाई लक्षित गरी सञ्चालन गरिएको अनुगमनले अवैध रूपमा मदिरा बिक्री वितरण गर्ने गतिविधि नियन्त्रण गर्न तथा मदिराका कारण उत्पन्न हुन सक्ने सामाजिक समस्या न्यूनीकरण गर्न सहयोग पुग्ने अपेक्षा गरिएको छ ।

जिल्ला प्रशासन कार्यालय रोल्पाका प्रमुख जिल्ला अधिकारी सुरेश सुनारले चाडपर्वका बेला शान्ति सुरक्षा कायम राख्नुका साथै समाजमा हुने विकृति र विसङ्गति नियन्त्रण गर्न प्रशासनले विशेष ध्यान दिएको बताएका छन् । व्यक्तिले आफ्नो इच्छाअनुसार चाडपर्व मनाउन पाउने भए पनि त्यसबाट अरूलाई असर पर्ने, समाजको शान्ति सुरक्षामा खलल पुग्ने वा गैरकानुनी गतिविधि हुने काम गर्न नहुने उनले बताएका छन् ।

मादक पदार्थ सेवन गरी सार्वजनिक स्थानमा होहल्ला गर्ने, झैझगडा गर्ने, जुवातास खेल्ने तथा समाजमा नकारात्मक प्रभाव पार्ने गतिविधिमा संलग्न हुनेलाई कानुनबमोजिम कारबाही गरिने प्रमुख जिल्ला अधिकारी सुनारले बताएका छन् । चाडपर्व मनाउने नाममा सार्वजनिक शान्ति भङ्ग गर्ने वा अन्य व्यक्तिको सुरक्षामा असर पुर्‍याउने गतिविधि नगर्न उनले सबैलाई आग्रह गरेका छन् । त्यसैगरी, मादक पदार्थ सेवन गरी सवारीसाधन चलाउँदा सडक दुर्घटनाको जोखिम बढ्ने भएकाले त्यसलाई नियन्त्रण गर्न ट्राफिक प्रहरी तथा सुरक्षाकर्मीलाई चेकजाँचमा कडाइ गर्न निर्देशन दिइएको जनाइएको छ । मादक पदार्थ सेवन गरेर सवारी चलाउने चालकलाई नियन्त्रणमा लिई कानुनअनुसार कारबाही गर्ने तथा सम्भावित दुर्घटना न्यूनीकरणका लागि आवश्यक सुरक्षा व्यवस्था मिलाउने काम भइरहेको छ ।

चाडपर्वका समयमा यात्रुको चाप बढ्ने र सार्वजनिक सवारीसाधनमा मनपरी भाडा असुल्ने समस्या देखिन सक्ने भएकाले भाडादरको समेत अनुगमन गरिने प्रशासनले जनाएको छ । तोकिएकोभन्दा बढी भाडा लिएको पाइएमा सम्बन्धितलाई कानुनबमोजिम कारबाही गरिने बताइएको छ । यात्रुलाई सुरक्षित र सहज रूपमा गन्तव्यसम्म पुग्ने वातावरण निर्माण गर्न सुरक्षा निकाय तथा ट्राफिक प्रहरीलाई निगरानी बढाउन आग्रह गरिएको छ ।

जिल्ला प्रहरी कार्यालय रोल्पाका अनुसार घरेलु मदिराको बिक्री वितरण नियन्त्रण गर्ने अभियान जिल्लाका विभिन्न स्थानमा निरन्तर सञ्चालन गरिनेछ । इलाका प्रहरी कार्यालयहरू, स्थानीय तह तथा सम्बन्धित निकायसँग समन्वय गरेर बजार, होटल तथा पसलमा अनुगमनलाई थप प्रभावकारी बनाइने जनाइएको छ । विशेषगरी चाडपर्वका बेला मदिरा सेवनका कारण हुने झैझगडा, घरेलु हिंसा, सामाजिक अशान्ति तथा सडक दुर्घटनाजस्ता घटनालाई न्यूनीकरण गर्ने उद्देश्यले सुरक्षा निगरानी बढाइएको हो । प्रशासनले चाडपर्वलाई सभ्य, मर्यादित र सुरक्षित रूपमा मनाउन जिल्लावासीलाई आग्रह गरेको छ । आफ्नो क्षमता र अवस्थाअनुसार चाडपर्व मनाउँदै गर्दा अरूको अधिकार, सामाजिक सद्भाव र सार्वजनिक सुरक्षामा असर नपार्न पनि सम्बन्धित निकायले अनुरोध गरेका छन् ।

दशैं–तिहारलाई लक्षित गरी सञ्चालन गरिएको अनुगमनले घरेलु मदिराको अनियन्त्रित बिक्री वितरण रोक्न, कानुनविपरीतका गतिविधि नियन्त्रण गर्न तथा जिल्लामा शान्ति सुरक्षा कायम राख्न मद्दत पुग्ने अपेक्षा गरिएको छ । चाडपर्वका समयमा हुन सक्ने सम्भावित दुर्घटना र सामाजिक विकृति रोक्न सुरक्षा निकाय तथा स्थानीय सरकारबीचको समन्वयलाई थप प्रभावकारी बनाइने जनाइएको छ ।