© 2026
२५ श्रावण २०८३, सोमबार
२५ श्रावण २०८३, सोमबार
पाल्पा ।
पाल्पाको तिनाउ गाउँपालिका–४, चिउरी डाँडास्थित भित्री कच्ची सडकमा जिप दुर्घटना हुँदा चालकसहित १० जना घाइते भएका छन् ।
सोमबार बिहान करिब ७ बजे झुम्सा–सत्यवती–धसमिघा सडकखण्डअन्तर्गत माझगढी गाउँपालिका–५, बंसीङ डाँडाबाट बुटवलतर्फ जाँदै गरेको लु १ ज २२३७ नम्बरको मुस्ताङ पिकअप जिप अनियन्त्रित भई दुर्घटनामा परेको हो ।
प्रहरीका अनुसार जिप सडकबाट करिब ११० मिटर तल खसेको थियो । दुर्घटनाको खबर प्राप्त हुनासाथ प्रहरी चौकी दोभान, पाल्पाबाट खटिएको टोली घटनास्थलमा पुगेर घाइतेहरूको उद्धार गरेको थियो ।
दुर्घटनामा जिप चालक देवकुमार घर्तीसहित १० जना घाइते भएका छन् । घाइतेमध्ये एकजनाको अवस्था गम्भीर र ९ जनाको अवस्था मध्यम रहेको प्रहरीले जनाएको छ ।
घाइते सबैलाई उपचारका लागि लुम्बिनी प्रादेशिक अस्पताल, बुटवल पठाइएको छ । घाइतेहरूको नाम, थर र ठेगाना भने हालसम्म खुल्न सकेको छैन ।
घटनाबारे थप अनुसन्धान भइरहेको पाल्पा प्रहरीले जनाएको छ ।
© 2026
All rights reserved.
Design & Developed By:
