सामग्री खोज्नुहोस्

मस्को । रुसी राष्ट्रपति भ्लादिमिर पुटिनले उत्तर कोरियाली विदेशमन्त्री चो सोन हुईसँग उच्चस्तरीय भेटवार्ता गरेका छन् । रुसी सरकारी सञ्चारमाध्यमका अनुसार पुटिनले युक्रेनविरुद्धको युद्धमा प्योङयाङले गरेको समर्थनप्रति धन्यवाद व्यक्त गरेका छन् ।

कुनै बहुपक्षीय कूटनीतिक कार्यक्रम वा राष्ट्रिय उत्सवको अवसरबिना भएको चोको रुस भ्रमणले उत्तर कोरियाली नेता किम जोङ उनको सम्भावित रुस भ्रमणको तयारी भइरहेको अड्कलबाजीलाई थप बल दिएको छ । उत्तर कोरियाली सञ्चारमाध्यमका अनुसार चो रुसी विदेशमन्त्री सर्गेई लाभरोभको निमन्त्रणामा शनिबार रुस पुगेकी हुन् । यद्यपि, भ्रमणको उद्देश्यबारे प्योङयाङले विस्तृत जानकारी दिएको छैन ।

दक्षिण कोरियाको एकीकरण मन्त्रालयका प्रवक्ता युन मिन होले सोमबार सोलले यी भेटवार्तालाई नजिकबाट नियालिरहेको बताएका छन् । तर, मस्को र प्योङयाङबीच अर्को नेतास्तरीय शिखर बैठकको तयारी भइरहेको छ वा छैन भन्ने विषयमा उनले टिप्पणी गर्न अस्वीकार गरेका छन् ।

रुसी समाचार संस्था ‘टास’का अनुसार क्रेमलिनमा भएको भेटमा पुटिनले दुई देशबीचको सम्बन्धको प्रशंसा गर्दै युक्रेनमा जारी सैन्य कारबाहीका क्रममा सहयोग गरेकोमा उत्तर कोरियाली नेतृत्व र जनताप्रति कृतज्ञता व्यक्त गरेका छन् ।

जवाफमा चोले किम जोङ उन रुससँगको सम्बन्धलाई अझ व्यापक रूपमा विकास गर्न प्रतिबद्ध रहेको बताएकी छन् ।

किमले यसअघि सन् २०१९ र २०२३ मा पुटिनसँग शिखर वार्ताका लागि रुस भ्रमण गरेका थिए । सन् २०२४ को जुनमा पुटिनको प्योङयाङ भ्रमणका क्रममा दुई नेताले रणनीतिक साझेदारीसम्बन्धी सम्झौतामा हस्ताक्षर गर्दै कुनै पनि पक्षमाथि आक्रमण भएमा पारस्परिक सहयोग गर्ने प्रतिबद्धता जनाएका थिए ।

पछिल्ला वर्षहरूमा उत्तर कोरियाले रुससँगको सम्बन्धलाई विशेष प्राथमिकता दिँदै आएको छ । किम प्रशासनले युक्रेन युद्धमा रुसलाई सैनिक र हतियार सहयोग उपलब्ध गराएको आरोप लाग्दै आएको छ । त्यसको बदलामा उत्तर कोरियाले आर्थिक सहायता र सैन्य प्रविधि प्राप्त गरिरहेको हुन सक्ने विश्लेषकहरूको भनाइ छ ।

यसैबीच, किमले चीनसँग पनि सम्बन्ध सुदृढ बनाउने प्रयासलाई निरन्तरता दिएका छन् । गत जुनमा उनले चिनियाँ राष्ट्रपति सी जिनपिङसँग प्योङयाङमा भेटवार्ता गरेका थिए ।

उत्तर कोरियाले अमेरिका र उसका सहयोगी राष्ट्रहरूको प्रभावको प्रतिरोध गर्ने उद्देश्यले रुस र चीनसँगको रणनीतिक सहकार्य विस्तार गरिरहेको विश्लेषण गरिएको छ ।

रुस भ्रमणअघि उत्तर कोरियाका उच्च अधिकारीहरूले चीनको भ्रमण गरेका थिए । उत्तर कोरियाली मन्त्रिपरिषद्का प्रमुख पाक थे सोङले बेइजिङमा सी जिनपिङसँग भेटवार्ता गरेका थिए भने चिनियाँ कम्युनिस्ट पार्टीका वरिष्ठ नेता वाङ हुनिङ प्योङयाङ पुगेर किमसँग छलफल गरेका थिए ।

सन् २०१९ मा तत्कालीन अमेरिकी राष्ट्रपति डोनाल्ड ट्रम्पसँगको आणविक वार्ता असफल भएपछि किमले अमेरिका र दक्षिण कोरियासँगको संवाद लगभग स्थगित गर्दै आएका छन् ।

युक्रेन युद्धलाई उनले आफ्नो आणविक हतियार तथा क्षेप्यास्त्र कार्यक्रम विस्तार गर्ने अवसरका रूपमा उपयोग गरिरहेको आरोप लाग्दै आएको छ । अर्कोतर्फ, अमेरिकाले उत्तर कोरियासँगको वार्ताका लागि आणविक निशस्त्रीकरणलाई प्रमुख सर्त बनाउँदै आएको छ ।