खोज

बुटवल – वातावरणविद् तथा साहित्यकार विजय हितान र बुटवलका साहित्यप्रेमी पाठकका  बीचमा पर्या साहित्यका विषयमा छलफल भएको छ।

साेमबार पाठक मञ्च बुटवलकाे आयाेजनामा साहित्यकार हितानसँग पर्या साहित्यबारे छलफल गरिएकाे हाे। रुपन्देहीको बुटवलमा जन्मिएर बेलायतको वातावरण संस्थानमा वातावरण विज्ञका रुपमा कार्यरत हितानले हालै लाहुरेको रेलिमाइ नामक उपन्यास ल्याएका थिए।

पर्या साहित्य सिर्जनामा विशेष पहिचान बनाएका उनले पाठकहरुसँग छलफल गर्दै विश्वव्यापी रुपमा वातावरण संरक्षणका मुद्दाहरु उठान भइरहेको र नेपालमा पनि यसबारेमा चर्चा गर्न आवश्यक रहेको बताए। उनले पर्या साहित्यमा कलम चलाउन र वातावरण संरक्षणका लागि भूमिका निर्वाह गर्न आग्रह गरे।

हितानले वातावरण संरक्षण आफ्नाे मुख्य सराेकारको विषय रहेको बताउदै पर्या साहित्यका माध्यमबाट वातावरण संरक्षणका मुद्दा उठाउँदै आएको बताए।

लेखक हितानकाे कविता संग्रह “मलाई आर्यघाटमा नजलाउनु”माथि अध्येता कृष्ण पाण्डेले समीक्षा गर्दै पर्या साहित्यकाे नमूनाका रुपमा यो पुस्तकलाई लिन सकिने बताए।

पाठक मञ्चका माधव गाैतमले सहजीकरण गरेको छलफलमा लेखक दलबहादुर गुरूङ, राजेन्द्र आचार्य, डा. मनाेज ढुंगाना, रामचन्द्र श्रेष्ठ, शंकर भण्डारी, माधव कुमार पाैडेल, पत्रकार कृष्ण मल्ल, दीपक विश्वकर्मा, विनाेद परियार, अर्जुन ज्ञवाली, प्रेम परियार, कृष्ण गाउँले लगायतले पर्या साहित्य र वातावरण संरक्षणका बारेमा विभिन्न जिज्ञासा र सुझावहरू व्यक्त गरेका थिए।