खोज

 काठमाडौं, २५ कात्तिक ।

मधेश प्रदेशका नवनियुक्त मुख्यमन्त्री सरोज कुमार यादवले आफ्नो दबाबमै तत्कालीन प्रदेश प्रमुख सुमित्रा सुवेदी भण्डारीले आफूलाई होटलमा शपथ ग्रहण गराएको बताएका छन् ।

आज पत्रकार सम्मेलन गर्दै मुख्यमन्त्री यादवले उक्त जानकारी दिएका हुन् ।

मुख्यमन्त्री यादवका अनुसार विहीबार राति आफूलाई नियुक्तिपत्र दिइएको थियो । तर, प्रदेश प्रमुख उपचारका लागि काठमाडौं जाँदै गरेको जानकारी पाएपछि आफूले जसरी भए पनि शपथ ग्रहण गराउन दबाब दिएको उनले बताए ।

‘मैले उहाँलाई दबाब दिएँ, दिएकै हो,’ यादवले पत्रकार सम्मेलनमा भने । संविधानको धारा १६८ को उपधारा (२) बमोजिम मुख्यमन्त्री बनेका लोसपा नेता जितेन्द्र सोनलले विश्वासको मत पाउने अवस्था नदेखेपछि कात्तिक २२ गते प्रदेशसभामा राजीनामा दिएका थिए ।

त्यसपछि सबैभन्दा ठूलो दलको हैसियतमा नेकपा एमालेका नेता सरोज कुमार यादव कात्तिक २४ गते संविधानको धारा १६८ को उपधारा (३) अनुसार मुख्यमन्त्री नियुक्त भएका थिए ।

यादवका अनुसार आफूलाई राति साढे १० देखि पौने ११ बजेतिर बोलाएर प्रदेश प्रमुख सुवेदीले नियुक्तिपत्र दिएकी थिइन् । तर, त्यस समयमा सोनलको पक्षमा रहेका दलहरूले संविधानको धारा १६८(२) अनुसार नै नयाँ मुख्यमन्त्री नियुक्त हुनुपर्ने माग गर्दै आएका थिए ।

मुख्यमन्त्री यादवले भने, ‘मैले उहाँलाई दबाब दिएँ । दिएकै हो । यसमा म पछाडि हट्दिनँ, झूटो बोल्दिनँ । केयरटेकर मुख्यमन्त्री हुनुहुन्छ, नयाँ मुख्यमन्त्रीको नियुक्ति भइसकेको छ । तपाईंले मलाई शपथ नखुवाइकन मेरो पद सक्रिय हुनेवाला छैन । यसो हुँदा मधेश प्रदेश अझ अन्यौलमा पर्छ भन्ने सोचेर मैले उहाँलाई जहाँ हुनुहुन्छ, त्यहीँ शपथ गराइदिन आग्रह गरेको हुँ ।’

उनले थपे, ‘तपाईंले त्यहाँ गर्न सक्नुहुन्न भने कुन उपयुक्त स्थान हुन्छ, त्यहाँ मलाई शपथ खुवाइदिनुपर्यो भनेर मैले रिक्वेस्ट गर्दा उहाँले भन्नुभयो— म निस्किसकेकी छु, तपाईं आउन सक्नुहुन्छ भने बर्दिबास आउनुस् । त्यसपछि म बर्दिबास गएँ र पानस होटलमै इमान्दारितापूर्वक नियुक्तिपत्रअनुसार शपथ ग्रहण गरेँ ।’

यस घटनापछि विवाद तीव्र बनेको छ । संघीय सरकारले प्रदेश प्रमुख सुमित्रा सुवेदी भण्डारीलाई पदमुक्त गरिसकेको छ । यता, मुख्यमन्त्री नियुक्तिको प्रक्रियाप्रति असन्तुष्ट दलहरूले सर्वोच्च अदालतमा रिट दायर गरेका छन् ।