खोज

२९ असोज, काठमाडौं ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङसँग नेपालका लागि जर्मनीका राजदूत उडो युजेन भोल्जले भेट गरेका छन् ।

सिंहदरबारस्थित ऊर्जा, जलस्रोत तथा सिँचाइ मन्त्रालयमा भएको भेटमा राजदूत भोल्जले मन्त्री घिसिङलाई जर्मनी सरकारको तर्फबाट बधाई दिँदै सफल कार्यकालको शुभकामना व्यक्त गरे ।

भेटका क्रममा जर्मनी–नेपालबीचको आर्थिक सहकार्य, जर्मनीको सहयोगमा सञ्चालित सौर्य आयोजना, लेखनाथ–दमौली २२० केभी प्रसारण लाइन आयोजना, ऊर्जा रूपान्तरणका सम्भावित क्षेत्र लगायतका विषयमा छलफल भएको थियो ।

मन्त्री घिसिङले जर्मनीले नेपाललाई गर्दै आएको सहयोगको प्रशंसा गर्दै भविष्यमा पनि सहयोग थप बढाउन आग्रह गरे । उनले जर्मनीको सहायतामा निर्माण भएका मध्यमर्स्याङ्दी र मस्र्याङ्दी जलविद्युत् आयोजना नेपालको ऊर्जा क्षेत्रमा ‘लाइफलाइन’ भएको बताए ।

त्यसैगरी, जर्मनी र युरोपेली संघको संयुक्त सहयोगमा अघि बढाइएको पोखरा–बुटवल–भरतपुर हरित त्रिकोण परियोजना सन् २०२९ सम्ममा विकास हुने लक्ष्य रहेको र त्यो क्षेत्र ऊर्जा खपतको दृष्टिले महत्त्वपूर्ण हुने उल्लेख गर्दै मन्त्री घिसिङले विद्युत्का लागि आवश्यक प्रसारण तथा वितरण सञ्जालको विस्तार र सुधार तत्काल सुरु हुने जानकारी दिए ।

उनले पोखरा, बुटवल र भरतपुर सहरलाई जोड्ने सडकहरू विस्तार भइरहेको हुँदा ट्रलीबस सञ्चालन, चार्जिङ स्टेसनको स्थापना तथा बढ्दो विद्युत् खपत व्यवस्थापनका लागि प्रसारण तथा वितरण प्रणालीमा सुधार गर्न आवश्यक अध्ययन तथा सहयोगको माग गरे ।

जेनजी आन्दोलनका क्रममा आगलागीबाट गम्भीर क्षति पुगेका सार्वजनिक तथा सरकारी संरचनाको परीक्षण गरी पुनर्निर्माणको आवश्यकता औंल्याउँदै मन्त्री घिसिङले नेपालमा पर्याप्त स्वदेशी विज्ञ नहुँदा अन्तर्राष्ट्रिय विज्ञ सहयोग उपलब्ध गराइदिन आग्रह गरे ।

भेटका क्रममा राजदूत भोल्जले आगामी दुई वर्षका लागि नेपाललाई प्रदान गरिने जर्मन सहायताका क्षेत्र पहिचान गर्न तथा सहयोगको पुनरावलोकन गर्न परामर्शका लागि सन् २०२५ डिसेम्बरमा एक जर्मन टोली नेपाल आउने जानकारी गराए ।