खोज

काठमान्डौ, २४ असोज ।

सरकारले त्रिभुवन विश्वविद्यालयको जग्गा तथा अचल सम्पत्ति खोजबिन समितिले तयार पारेको प्रतिवेदन सार्वजनिक गर्ने निर्णय गरेको छ । शिक्षा, विज्ञान तथा प्रविधि मन्त्री महावीर पुनले सामाजिक सञ्जालमार्फत मन्त्रालयमा भएको छलफलपछि यस्तो निर्णय भएको जानकारी दिएका छन् ।

त्यस्तै, नेपालमा रहेका क्यान्सर अस्पतालहरूमा बिरामीको उपचारमा प्रयोग हुने रेडियोधर्मी औषधिहरूको उत्पादन नेपालमै गर्न आवश्यक कदम अगाडि बढाउने निर्णय गरिएको छ । यसका लागि आणविक अनुसन्धान केन्द्रलाई औषधि उपचारका लागि तत्काल सञ्चालनमा ल्याउने पहल हुने मन्त्री पुनले बताए ।

सिटिइभिटीको पुनर्संरचना गरी त्यहाँबाट सक्षम जनशक्ति उत्पादन गर्न सकिने बनाउने उद्देश्यले कार्यदल तुरुन्त गठन गर्ने निर्णय पनि भएको छ ।

यसैगरी, राष्ट्रिय विज्ञान तथा प्रविधि प्रतिष्ठान (नास्ट) मा वैज्ञानिक अनुसन्धान र नवप्रवर्तन कार्यलाई उपलब्धिमूलक बनाउन, प्रतिभाशाली नेपालीहरूलाई तान्न र संस्थालाई प्रभावकारी रूपमा काम गर्न सक्ने बनाउन आवश्यक सुधार र पुनर्संरचनाका लागि पनि कार्यदल गठन गर्ने निर्णय भएको उनले जानकारी दिएका छन् ।

त्यस्तै, संस्कृत विश्वविद्यालयमा रिक्त रहेको सेवा आयोगका पदाधिकारीहरूको पदमा नियमानुसार तुरुन्त नियुक्ति गर्ने निर्णय पनि सरकारले गरेको छ।