खोज

दाङ, २२ माघ।

विश्व क्यान्सर दिवसका अवसर पारेर आजदेखि किशोरीलाई पाठेघरको मुखको क्यान्सरविरुद्धको एचपीभी खोप अभियानको शुभारम्भ भएको छ। देशव्यापी खोप अभियान सञ्चालन भइरहेको अवस्थामा दाङमा पनि आज एक कार्यक्रम गरेर स्वास्थ्यकर्मीलाई खोप सामग्री प्रदान गरेर एचपीभी खोप अभियानको थालनी गरिएको हो।

जिल्ला खोप समन्वय समिति दाङको आयोजना तथा पालिका खोप समन्वय समिति घोराहीको समन्वयमा घोराही उपमहानगरपालिका वडा नम्बर १४ स्थित मदरसा दारुल हुडा अल् सल्फिया माविमा अध्ययनरत मुस्लिम समुदायका किशोरीलाई एचपीभी खोप लगाइएको छ।

जिल्लामा घोराही १४ राप्ती टोल निवासी मदरसा दारुल हुडा अल सल्फिया माविमा कक्षा ६ मा अध्ययनरत १२ वर्षीया हुमेरा खातुनलाई खोप लगाएर एचपीभी खोपको प्रमाण पत्रसमेत प्रदान गरिएको छ। सो विद्यालयमा अध्ययनरत २३ जनाले एचपीभी खोप लगाएका छन्। यसैगरी, जिल्लाभर ३९ हजार ४ सय ५० जना किशोरीलाई खोप लगाइदैछ।

खोप अभियानको उद्घाटन गर्दै जिल्ला खोप समन्वय समिति संयोजक नित्यानन्द शर्माले पाठेघरको मुखको क्यान्सरबाट जोगाउन एचपीभी खोप लगाउने लक्षित उमेरका सबैलाई अभियानमा जोडिन आग्रह गरे।

एचपीभी खोप अभियान बारे जानकारी गराउँदै स्वास्थ्य कार्यालय दाङका निमित्त कार्यालय प्रमुख किशोर आचार्यले स्वास्थ्य तथा जनसङ्ख्या मन्त्रालयका अनुसार मुलुकमा हरेक दिन पाठेघरको मुखको क्यान्सरबाट चार जना महिलाको मृत्यु हुने गरेको बताए। पाठेघरको मुखको क्यान्सर ह्युमन पेपिलोमाभाइरस सङ्क्रमणले हुने र नेपालमा महिलामा हुने विभिन्न क्यान्सरमध्ये पाठेघरको मुखको क्यान्सर दोस्रो स्थानमा रहेको जानकारी गराए।

दाङमा विद्यालयमा अध्ययनरत ३७ हजार दुई सय पाँच जना र विद्यालय बाहिर रहेका दुई हजार दुई सय ४५ जना गरेर ३९ हजार चार सय ५० जना किशोरीलाई खोप लगाउन थालिएको स्वास्थ्य कार्यालय दाङले जनाएको छ। जिल्लाका तीन सय ९१ वटा विद्यालयमा अध्ययनरत किशोरीलाई खोप लगाउनका लागि जिल्लामा चार सय ४७ वटा खोप केन्द्र तोकिएको छ। जसमा चार सय ३५ वटा विद्यालयमा र १२ वटा विद्यालय बाहिर खोप केन्द्र छन्। खोप अभियानको अवसरमा घोराही १४ का वडा अध्यक्ष भानसिंह बुढा, घोराही उपमहानगरपालिकाका निमित्त प्रमुख प्रशासकीय अधिकृत बासुदेव आचार्यलगायतले किशोरीको स्वास्थ्य सुरक्षित बनाउन सरकारले ल्याएको एचपीभी खोप अभियान सफल बनाउनु सबैको दायित्व भएको बताए। कार्यक्रमको सहजीकरण घोराही उपमहानगरपालिका जनस्वास्थ्य प्रवद्र्धन शाखा प्रमुख राधा पौडेलले गरेकी थिइन्। किशोरीहरूलाई पाठेघरको मुखको क्यान्सरबाट बचाउन आजदेखि फागुन ६ गतेसम्म खोप अभियान सञ्चालन हुनेछ।