खोज

बुटवल, २१ माघ । खेल क्षेत्रलाई विकासको गति दिन खेलक्षेत्रबाट नेतृत्व जरुरी रहने एक कार्यक्रममा बोल्ने बक्ताहरुले दाबी गरेका छन । रुपन्देहीमा शुरु भएको ३ दिवसीय लुम्बिनी प्रदेशस्तरिय सितोरियो कराते दीक्षान्त समारोहमा बोल्ने बक्ताहरुले खेलाडीहरुबाट नै खेल संस्थाको नेतृत्व लिनुपर्ने बताए ।

नेपाल सितेरियो कराते संघ, केन्द्रीय कमिटीको आयोजनामा सोमवार बुटवलमा आइतवारबाट सुरु गरिएको दीक्षान्त कार्यक्रमको उद्घाटन गर्दै नेपाल कराते महासंघका केन्द्रीय अध्यक्ष एवं राष्ट्रिय खेलकुद परिषदका पूर्व सदस्यसचिव युवराज लामाले खेल संस्थामा गैर ब्यक्तिको नेतृत्वको कारण पछि परेको दाबी गरेका छन । ‘राष्ट्रको विकास र खेल गतिविधि बढाउनका लागि खेलाडीहरुको महत्वपूर्ण भूमिका रहेको हुदा उनीहरुबाट नै खेल संस्थाहरुको नेतृत्व हुनुपर्छ ।’– उनले भने । नेपालको खेलकुद क्षेत्रलाई राजनीतिक नेतृत्वबाट विकृत र क्रिडास्थल बनाएको आरोप लगाउदै उनले त्यसलाई तोडेर अगाडी बढ्नु आजको आवश्यकता भएको जिकिर गरे । नेपालको खेलकुदको क्षेत्रमा मार्शल आटमध्ये पनि कराते खेलको विशिष्ट योगदान स्थान रहेको र अन्तराष्ट्रिय स्तरमा पदक दिलाउने विधाको रुपमा परिचित भएको बताए । करातेका नाममा मेनपावर कम्पनी चलाउने र संघसंस्थाको खेती गर्ने एक समुहको धन्दा रोकिएको दाबी गर्दै उनले पछिल्ला दिनमा यसैकारण कराते महासंघको विरोधमा लागेको आरोप लगाए । खेलकुद परिषद र विश्व कराते महासंघको अधिन र विधिमा कराते महासंघ अगाडी बढ्ने समेत उनले स्पष्ट पारे ।

कार्यक्रममा बुटवल उपमहानगरपालिकाका पूर्वप्रमुख शिवराज सुवेदीले खेलकुदको विकासका लागि आफ्नो नेतृत्वमा धेरै राम्रा कामहरु भएको बताउदै खेलकुद क्षेत्रलाई गलत राजनीतिक हस्तक्षेपबा विगार्ने काम गरेको हुदा त्यसका विरुद्ध लाग्न खेलाडीहरुलाई आग्रह गरे ।
कार्यक्रममा लुम्बिनी प्रदेश खेलकुद परिषदका पूर्व सदस्य सचिव जयप्रकाश भट्टराईले नेपाल ओलम्पिक कमिटीमा देखिएको विवादकै कारण नेपालको खेलकुद क्षेत्र बदनाम भैरहेको उल्लेख गर्दै संस्थागत रुपमा नचलेका संघ र नेतृत्वलाई वर्तमान ओलम्पिक कमिटीको नेतृत्वबाट काखी च्यापे गलत काम भएको बताए ।

कार्यक्रममा लुम्बिनी प्रदेशका ६ जिल्लाका करिब २ सय ५० कराते खेलाडीको सहभागिता रहेको छ । दीक्षान्त कार्यक्रमलाई दुई चरणमा गर्ने योजनासहित पहिलो चरणमा प्रदेशका ६ जिल्लाहरु रुपन्देही, कपिलबस्तु, नवलपरासी, पाल्पा, गुल्मी र अर्घाखाचीका खेलाडीलाई बुटवलको कार्यक्रममा समावेश गरिएको र दोस्रो चरणमा जिल्लाका खेलाडीहरुलाई समावेश गरि कार्यक्रम गर्ने तयारी रहेको संघका प्रदेश अध्यक्ष सन्तोष सिंहले बताए । सो अवसरमा सहभागी खेलाडीहरु मध्ये १ सय ५० जनालाई फष्ट र सेकेण्ड डन तथा बाकीलाई थर्ड डनमा अपग्रेडिङ गरिएको संघले जनाएको छ ।

कार्यक्रममा सिद्धार्थनगर नगरपालिकाका उपप्रमुख उमा अधिकारी, नेपाल खेलकुद पत्रकार मञ्च रुपन्देहीका अध्यक्ष सुमन अधिकारी, कार्यक्रम नेपाल सितेरियो कराते संघका अध्यक्ष दावा गुरुङ्क, प्रदेश सचिव नारायण थापाले खेल क्षेत्रमा देखिएको विकृति हटाउन सबै एकजुट हुुनुपर्ने बताए ।