खोज

लमही, ११ माघ ।
दाङ लमही नगरपालिका–५ लमहीमा देउखुरी उद्योग वाणिज्य संघको आयोजनामा बिहीबार सुरू भएको सातौँ देउखुरी कृषि पर्यटन, तथा व्यापारिक महोत्सवका प्रमुख अतिथि लुम्बिनी प्रदेशका उद्योग पर्यटन तथा यातायात मन्त्री प्रचण्डविक्रम न्यौपानेलाई आयोजकले बँधिया भाले उपहार दिएको छ ।

महोत्सवको उद्घाटन गर्न गएका मन्त्री न्यौपानेलाई आयोजकले यस्तो उपहार दिएको हो । महोत्सवको उद्घाटन गर्दै लुम्बिनी प्रदेश उद्योग, पर्यटन तथा यातायातमन्त्री न्यौपानेले लुम्बिनी प्रदेशलाई नेपालको उत्कृष्ट पर्यटकीय गन्तव्यका रूपमा स्थापित गर्ने बताएका छन् । उनले भारतसँग जोडिएको दाङको कोइलाबास नाकालाई सहज रूपमा सञ्चालन गर्न संघीय सरकारले गम्भीरता देखाउनुपर्ने आवश्यकता औंल्याएका छन् ।

मन्त्री न्यौपानेले दाङको कोइलाबास भन्सार कार्यालयमार्फत पर्यटक र पटके व्यवस्थापनलाई सरल बनाउँदै भारतीय पर्यटकलाई नेपाल भित्र्याउन सहज वातावरण सिर्जना गर्न प्रदेश सरकार प्रतिबद्ध रहेको बताए । देउखुरी उद्योग वाणिज्य संघ, लमहीद्वारा आयोजित सातौँ देउखुरी कृषि, पर्यटन तथा व्यापारिक महोत्सव २०८१ को उद्घाटन कार्यक्रममा उनले तीनै तहका सरकार एकसाथ उभिएर रोजगारी सृजना गर्नुपर्नेमा जोड दिए । साथै, उनले नेपाली नागरिकलाई विदेश पलायनबाट रोक्न आफ्नै स्वदेशमा अवसर सिर्जना गर्न सरकारहरूबीच सहकार्य आवश्यक रहेको बताएका छन् । कार्यक्रममा विभिन्न संघ–संस्थाका प्रतिनिधि र स्थानीय तहका प्रमुखहरूको उपस्थिति रहेको थियो । महोत्सवको पहिलो दिन राष्ट्रिय तथा स्थानीय कलाकारहरूले मनोरञ्जन प्रदान गरेका थिए ।