धादिङ, १० माघ ।
उपप्रधानमन्त्री एवम् शहरी विकास मन्त्री प्रकाशमान सिंहले समाजको विकासमा संस्कृतिको महत्त्वपूर्ण भूमिका रहेको बताएका छन्। बिहीबार धादिङ लोकसांस्कृतिक महोत्सवमा सम्बोधन गर्दै उनले भने, “हाम्रो समाजलाई अघि बढाउन संस्कृतिले ठूलो भूमिका निर्वाह गर्छ, त्यसैले आफ्नो पहिचानलाई बचाइ राख्नका लागि साँस्कृतिक महोत्सवहरू मनाइ रहनु अत्यन्त आवश्यक छ।”
उनले भाषा, संस्कृति र भेषभूषाका साथै कला र परम्परालाई जिवित राख्न महत्त्वपूर्ण रहेको बताउँदै भने, “संस्कृति र परम्परालाई सँगै राख्दा मात्र हाम्रो पहिचान बलियो रहन्छ।”
उपप्रधानमन्त्री सिंहले लोकतान्त्रिक व्यवस्थामा कला, धर्म र संस्कृतिको संरक्षण र प्रवर्धनका लागि अनुकूल वातावरण सिर्जना भएको बताएका छन्। साथै, उनले धादिङमा लोक संस्कृति जगेर्ना गर्न महोत्सवको आयोजना गरेकोमा प्रशंसा गर्दै उक्त प्रयासलाई स्वागत गरेका छन्।
साथै, उनले धादिङ जिल्लाको पूर्वाधार विकासमा संघीय, प्रदेश र स्थानीय सरकार मिलेर काम गर्ने बताएका छन्। “अवश्यकता अनुसार प्राथमिकतामा राखेर तीनै तहका सरकार मिलेर काम अघि बढाउने छौं। सबै काम एकैपटक हुँदैन, तर नागरिकका लागि बढी आवश्यक पर्ने कामलाई प्राथमिकता दिइने छ,” उनले भने।
