खोज

पाल्पा, १३ मंसिर ।
पाल्पा, रामपुर नगरपालिका लोकसेवा आयोग तयारी कक्षा सुरु भएको छ । रामपुर नगरपालिकाको आयोजनामा मंगलबार देखि निःशुल्क दुई महिने लोक सेवा आयोग तयारी कक्षा सुरु भएको हो ।
तयारी कक्षाको रामपुर नगरपालिकाको सभाहलमा कार्यक्रम गरी शुभारम्भ गरिएको थियो । कक्षाको शुभारम्भ गर्दै रामपुर नगरपालिकाका प्रमुख प्रशासकीय अधिकृत सुर्य दर्शन पण्डितले उच्च मनोबलका साथ अध्ययन गरे सफलता प्राप्त गरिने उल्लेख गरे। साथै लगनशीलता र मेहेनतका साथ अध्ययन गर्न आग्रह गरेका थिए । यस्तै रामपुर नगरपालिकाका प्रशासन अधिकृत एवं लोक सेवा आयोग तयारी कक्षाका संयोजक युवराज पन्थीले कार्यक्रमको बारेमा प्रष्ट पार्दै लोक सेवा आयोगको तयारीका लागि ज्ञान सीप र तरिका सिकाइने बताए । शहीद बहुमुखी क्याम्पस रामपुरका स्ववियु सभापति ल्याकत अलीले लोकसेवा आयोगमा प्रतिस्पर्धा गर्नका लागि आवश्यक सिप प्रदान गर्न नगरपालिकाले लगानी गरेको र यो अवसरको भरपुर सदुपयोग गर्न अनुरोध गरेका थिए । । अन्य जिल्लाहरूको तुलनामा पाल्पाका राष्ट्रसेवक कर्मचारी कम रहेको भन्दै त्यसलाई वृद्धि गर्नका लागि लोक सेवा आयोगमा प्रवेश गर्नु पर्नेमा जोड दिए । योजना शाखा प्रमुख विक्रम बस्नेतका अनुसार लोकसेवा आयोग तयारी कक्षामा ७३ जनाको सहभागीता रहेको छ । रामपुर नगरपालिकाले केही वर्ष देखि निरन्तर रूपमा कक्षा सञ्चालन गर्दै आएको छ ।