खोज

बुटवल, १५ मंसिर ।

गएको जेठ २ गतेबाट सञ्चालनमा आएको गौतमबुद्ध अन्तर्राष्ट्रिय विमानस्थलको टर्मिनल भवन अहिलेबाट नै साँघुरो हुन थालेको छ । विमानस्थलको प्रस्थान कक्षले एकैपटक दुईवटा फ्लाइटका यात्रुहरु थेग्न नसक्ने अवस्थामा छ । बोर्डिङ पास लिएपछि जहाज कुरेर बस्नका लागि पर्याप्त मात्रामा सिट समेत छैन । दुईवटा फ्लाइट एकै समयमा भए भने सेवा प्रवाह हुनका लागि चाप पर्ने विमानस्थलका प्रवक्ता सुवाश झाले बताए ।

नेपाल वायुसेवा निगमको ग्राउन्ड हेन्डलिङको सेवामा रहेको विमानस्थलमा उपकरण र जनशक्तिको अभाव छ । तर उडान थपिने बित्तिकै उपकरण र जनशक्ति थप हुने पनि निगमले प्रतिवद्धता जनाएको नागरिक उड्डयन प्राधिकरणका सूचना अधिकारी ज्ञानेन्द्र भुलले बताए ।

विमानस्थलमा एउटा मात्र वाइडबडी सहित पाँचवटा जहाज पार्किङ गर्नका लागि ठाउँ रहेको छ । तर टर्मिनल भवन भने एउटा उडान मात्र धान्नका लागि सक्ने गरी बनाइएको छ । हरेक घण्टामा उडान अवतरण गर्ने भएमा दिनको ३० वटा सम्म फ्लाइट धान्न सकिने प्रवक्ता झाले बताए । “अहिलेकै संरचनाले एकैपटकमा दुईवटा फ्लाइटको व्यवस्थापन गर्नका लागि भने गाह्रो पर्छ”–उनले भने ।

भैरहवामा पनि वार्षिक ४० लाख यात्रु मापदण्डकै क्षेत्रीय अन्तर्राष्ट्रिय विमानस्थल बनाउने तयारीका साथ डिजाइन गरिएता पनि पछि अन्तर्राष्ट्रिय विमानस्थल बनाउने निर्णयमा सरकार पुगेको थियो । क्यानले विमानस्थलको धावनमार्ग ठूलो बनाए पनि टर्मिनल भवन भने ४० लाख यात्रु मापदण्डमै बनाएको छ । ठूलो टर्मिनल भवन बनाउनका लागि अहिलेकै आन्तरिक टर्मिनल भवन भत्काउनु पथ्र्यो । त्यसो गर्दा आन्तरिक उडान भने अवरुद्ध हुने क्यानका सूचना अधिकारी भुले बताए ।

अहिलेको टर्मिनललाई आन्तरिक बनाउने र अर्को एरोब्रिजसहितको सुविधा सम्पन्न टर्मिनल भवन बनाउने निष्कर्षमा प्राधिकरण पुगेको छ । अहिलेको आन्तरिक टर्मिनल भवन साँघुरो भएको र पुरानो भैसकेकोले नयाँ नै बनाउनुपर्ने थियो”–उनले भने । क्षेत्रीयबाट अन्तर्राष्ट्रिय विमानस्थल बनाउँदा टर्मिनल भवन भने सानो भएको क्यानको दावी छ । तर ३१ अर्व रुपियाँ भन्दा बढी लगानी भैसकेको अन्तर्राष्ट्रिय विमानस्थल बनाउँदा सरकारले दीर्घकालीन सोंच नराखेर बनाएको विज्ञहरुको आरोप छ ।

अहिलेकै टर्मिनल भवनलाई कम्तीमा तीनवटासम्म उडान थेग्ने गरी बनाउनुपर्ने थियो । क्यानले १४ अर्व खर्चिएर पाँचवटा एरोब्रिजसहितको अर्को टर्मिनल भवन बनाउँदै छ । महालेखा परीक्षकको ५९ औं प्रतिवेदनमा पनि लाभहानीको तुलनात्मक विश्लेषण गरेर मात्रै अर्को टर्मिनल भवन बनाउनुपर्ने सुझाव दिइएको छ । नारायणी पश्चिम जिल्लाका मानिसहरुलाई विदेश जानका लागि भैरहवा विमानस्थल सहज हो । तर वैदेशिक रोजगारीमा जानका लागि श्रमिकहरुलाई भैरहवाबाट नै श्रम स्वीकृति, स्वास्थ्य जाँच, भिसा लगायतका सुविधाहरु नहुँदा काठमाडौं नै धाउनुपर्ने बाध्यता रहेको छ ।

गौतमबुद्ध अन्तर्राष्ट्रिय विमानस्थलमा अन्तर्राष्ट्रिय वायुसेवा कम्पनी र यात्रुहरुलाई आकर्षित गर्नका लागि सुरुवातीमा श्रम स्वीकृति, स्वास्थ्य जाँच र भिसाका कामहरु पनि भैरहवाबाटै हुनुपर्छ ।